Túrkistan oblysynda áleýmettik mańyzy bar azyq-túlik qory qansha aıǵa jetedi
TÚRKІSTAN. KAZINFORM – Túrkistan oblysynda áleýmettik mańyzy bar azyq-túlik baǵasyn turaqtandyrý baǵytynda birqatar shara qabyldanǵan. Alaıda jekelegen saýda oryndarynda belgilengen talaptardyń saqtalmaýy áli de kezdesedi. Jyl basynan beri saýda ústemesin negizsiz arttyrýdyń 93 faktisi anyqtaldy.
Oblystyq aýyl sharýashylyǵy basqarmasynyń málimetinshe, óńirde áleýmettik mańyzy bar azyq-túlik taýarlarynyń 27 túri óndiriledi. Onyń 22 túri boıynsha ishki naryqtyń qajettiligi tolyq qamtamasyz etiledi. Atap aıtqanda, qyzanaq óndirisi ishki qajettilikten 10 ese, birinshi surypty bıdaı uny – 9,1 ese, qyryqqabat – 6,4 ese, qııar – 5 ese, sút – 4,2 ese, pııaz – 3,3 ese joǵary.
Vedomstvonyń habarlaýynsha, baǵany turaqty baqylaýda ustaý úshin turaqty monıtorıng jumystary qolǵa alynǵan. Máselen, jyl basynan beri óńirde saýda ústemesin negizsiz arttyrýdyń 93 faktisi anyqtalyp, tıisti ákimshilik sharalar qabyldanǵan.
– Jyl basynan beri turaqtandyrý qoryna 20 myń tonna áleýmettik mańyzy bar azyq-túlik taýary satyp alyndy. Aınalym shemasy, forvardtyq kelisimsharttar jáne qoımadaǵy qorlardy qosa eseptegende, óńirde jalpy 22 myń tonna azyq-túlik qory qalyptastyrylǵan. Bul qor oblystyń qajettiligin 6 aıǵa deıin qamtamasyz etýge múmkindik beredi, – delingen basqarma málimetinde.
Sondaı-aq qazir Túrkistan, Kentaý jáne Arys qalalarynda 42 áleýmettik dúken jumys isteıdi. Onda negizgi azyq-túlik taýarlary naryqtaǵy baǵadan orta eseppen 20-30 paıyzǵa tómen satylady. Budan bólek, azyq-túlik baǵasyn turaqtandyrý maqsatynda 70 iri sýpermarketpen jáne 10 taýar óndirýshimen memorandým jasalǵan.
Buǵan deıin Túrkistan oblysyndaǵy kókónis saqtaý qoımalarynyń jaı-kúıi týraly jazǵan edik.
