Túrkistan oblysynda alaıaqtyq jasaǵan turǵyn qarjyny qumar oıynǵa jumsaǵan

TÚRKІSTAN. KAZINFORM – Túrkistan oblysynyń Saıram aýdanynda alaıaqtyqpen aınalysqan turǵyn ustaldy. Bul týraly oblystyq polıtsııa departamentiniń baspasóz qyzmeti málimdedi.

Tergeý málimetinshe, jumyssyz er adam azamattarǵa «emtıhansyz júrgizýshi kýáligin alyp beremin» dep ýáde bergen. Ol ár jábirlenýshiden aldyn ala 230 myń teńge alyp, aqshany jeke qajetine jaratqan.

Tártip saqshylary kúdiktiniń osy tektes 19 alaıaqtyq deregine qatysy baryn anyqtady. Jalpy keltirilgen shyǵyn kólemi 4 mıllıon teńgege jýyqtaǵan.

– Er adam alǵan qarjyny qumar oıynǵa jumsaǵan. Qazirgi tańda kúdiktige qatysty qylmystyq is sotqa joldandy, – delingen vedomstvo taratqan resmı aqparatta.

Aıta keteıik, budan buryn Shymkentte onlaın oıyn satyp almaq bolǵan oqýshy alaıaqtardyń qurbany bolǵanyn jazǵan bolatynbyz. Ol anasynyń bank kartasyndaǵy derekterdi bógde adamǵa joldap, nátıjesinde 2 mıllıon teńgeden astam qarjydan aıyryldy.