Túrkistan oblysynda aqqýlar qystap jatyr
TÚRKІSTAN. KAZINFORM – Tabıǵat janashyrlary kóktemge deıin qustardyń qaýipsizdigin baqylaýda.

Áleýmettik jelide shaǵyn kólde júzip júrgen aqqýlardyń vıdeosy tarady. Onda toptana ushqan aqqýlardyń sýǵa qonǵanyn, sý betinde erkin júrgenin kórýge bolady.
Vıdeo «Syrdarııa-Túrkistan» memlekettik óńirlik tabıǵı parkiniń aýmaǵynda túsirilgen. Qoryq qyzmetkerleri aqqýlardyń Ońtústikte qystap jatqandyǵyn jetkizdi. Sondaı-aq, tabıǵat janashyrlary kóktemge deıin qustardyń qaýipsizdigin baqylaýǵa alǵan.

- Aqqýlar jyl saıyn Ońtústikte qystaıdy. Ótken jyldarmen salystyrǵanda bıyl kelgen aqqýlardyń sany az. Máselen, ótken jyldary óńirge 2000-ǵa jýyq aqqý kelgen bolsa, bıyl 600-700-i ǵana júr. Qazir sulýlyqtyń sımvoly sanalatyn qustar tabıǵı park aýmaǵynda qystap jatyr. Kópshiligi Soltústik aımaqtan keledi. Sebebi, Túrkistanda kún jyly bolǵandyqtan ózen-kólderdiń betine muz qatpaıdy. Olar kóbine sýdaǵy ósimdiktermen qorektenedi. Kóktemde qaıta ushyp ketedi,-deıdi «Syrdarııa-Túrkistan» memlekettik óńirlik tabıǵı parkiniń ǵylym, aqparat jáne monıtorıng bóliminiń meńgerýshisi Nurıla Jaýynbaıqyzy.
Aıta keteıik, budan buryn Túrkistanda aǵashtar búrshik ata bastaǵanyn jazǵan bolatynbyz.