Túrkistan oblysynda ákesin uryp-soǵyp, azaptaǵan er adam sottaldy

TÚRKІSTAN. KAZINFORM – Túrkistan oblysy Jetisaı aýdandyq soty Shardara aýdany Qosseıit aýylynda ákesin uryp-soǵyp, azaptaǵan 41 jastaǵy Almas Sadaqbaevty 5 jylǵa bas bostandyǵynan aıyrdy.

Sot ony «Qınaý» jáne «Densaýlyqqa qasaqana ortasha aýyrlyqtaǵy zııan keltirý» baptarymen kináli dep tanydy.

41 jastaǵy Almas Sadaqbaevqa 70 jastaǵy múgedek ákesin tiri kezinde birneshe ret uryp-soǵyp, qınady degen aıyp taǵylǵan. Ol ótken jyldyń tamyz aıynda múgedek ákesin keminde úsh ret soqqyǵa jyqqan.

Tergeý dereginshe, qart ákesiniń dáretke ózdiginen shyǵa almaıtynyna ashýlanyp, oǵan kúsh qoldanǵan.

– Sottalýshy 2020 jyldan beri densaýlyǵy nasharlap, qozǵalýynda qıyndyqtary bolǵan 70 jastaǵy ákesin júıeli túrde uryp-soqqan. Saldarynan jábirlenýshi fızıkalyq jáne psıhıkalyq azap shegip, densaýlyǵyna ortasha aýyrlyqtaǵy zııan keltirilgen. Sot jaza taǵaıyndaý kezinde jeńildetetin mán-jaılardy: buryn sottalmaǵany, kinásin moıyndaýy jáne ókinish bildirýi, kámeletke tolmaǵan balalarynyń bolýyn eskerdi. Aýyrlatatyn mán-jaılar anyqtalmaǵan. Sot úkimimen S.-ǵa túpkilikti jaza retinde 5 jyl merzimge bas bostandyǵynan aıyrý jazasy taǵaıyndaldy, - dep habarlady Túrkistan oblystyq sotynyń baspasóz qyzmeti.

Sottalýshynyń kinási óziniń túsiniktemelerimen, kýálardyń aıǵaqtarymen, aýdıo-beıne materıaldarmen, sondaı-aq sot-medıtsınalyq saraptamalardyń qorytyndylarymen tolyq dáleldendi.

– Іstegen isime ómir boıy ókinemin. Qatelestim, tolyq moıyndaımyn. Barsha Qazaq elinen keshirim suraımyn. Aman-esen bostandyqqa shyǵyp, bala-shaǵamnyń qasynda bolsam deımin, - dedi Sadaqbaev sotta sóılegen sózinde.

Úkim zańdy kúshine engen joq.

Budan buryn Túrkistan oblysynda ákesin uryp, qorlyq kórsetken turǵyn qamaýǵa alynǵanyn jazǵan edik.

Keıinnen qaıtys bolǵan qarııanyń máıitine eksgýmatsııa jasalyp, saraptama taǵaıyndaldy. 

Shardaradaǵy qarııanyń ólimi boıynsha is sotqa joldandy. 

Buǵan deıin ótken sot otyrysynda prokýror sottalýshyǵa 6 jyl 2 aı jaza surady.