Túrkistan oblysynda aǵynsý tapshylyǵy máselesi qalaı sheshilip jatyr
TÚRKІSTAN. KAZINFORM – Bıyl Maqtaaral, Shardara jáne Jetisaı aýdandarynda 24 myń gektar alqapqa sý únemdeý tehnologııalaryn engizý josparlanyp otyr. Qazirgi ýaqytta taýar óndirýshilerden 10,6 myń gektar jerge sý únemdeý tehnologııalaryn engizýge qatysty usynystar kelip tústi.
Túrkistan oblysy aýyl sharýashylyǵyn damytýǵa basymdyq bergen óńir bolǵandyqtan, munda aǵynsý máselesi ózekti. Ótken jyly óńirde egistik alqaptaryn aǵynsýmen qamtamasyz etý maýsymy qalypty jaǵdaıda bastaldy. Alaıda jaýyn-shashyn mólsheriniń azdyǵy, aýa temperatýrasynyń joǵary bolýy sý tapshylyǵy qaýpin kúsheıtti.
Oblystyq aýyl sharýashylyǵy basqarmasynyń basshysy Faızýlla Baıdýllaevtyń aıtýynsha, óńirde sýarmaly jerdiń jalpy kólemi – 575 myń gektar. 2025 jylǵa oblysqa 4,6 mln m³ aǵynsý lımıti bekitilgen. Alaıda sý kóleminiń az kelý boljamyna baılanysty bıylǵa lımıt 3,8 mln m³ bolyp qaıta qaraldy. Ótken jyly naqty alynǵan sý kólemi 3,5 mln tekshe metrdi qurap, bekitilgen lımıttiń 76 paıyzy oryndalǵan.
– Oblystyń jyldyq sý paıdalaný lımıtiniń 63 paıyzy kórshi memleketterdiń aýmaǵynan keletin transshekaralyq ózenderge tıesili. Jahandyq jylynýdyń áserinen bul ózender arqyly keletin sý kólemi jyl saıyn azaıyp keledi. Ótken jyly bekitilgen 3,2 mlrd m³ lımıttiń 2,8 mlrd tekshe metri nemese 88 paıyzy ǵana naqty bosatylǵan. Qazirgi ýaqytta oblystaǵy 42 sý qoımasynyń jalpy syıymdylyǵy 8,8 mlrd tekshe metr bolsa, sý kólemi 4,0 mlrd m³ nemese 47%-ǵa jetip otyr. Atap aıtqanda, Shardara sý qoımasyna 3,3 mlrd m³, Kóksaraı sý rettegishine 567 mln m³, Bógen sý qoımasyna 169 mln m³ sý jınalǵan, – dedi ol.
Vedomstvo málimetine sáıkes, óńirde sý tapshylyǵyn boldyrmaý maqsatynda jańa sý qoımalaryn salý jumystary júrgizilip jatyr. Máselen, Báıdibek aýdanynda «Báıdibek ata» sý qoımasynyń qurylysy 75 paıyzǵa aıaqtalyp, nysandy osy jyldyń sońyna deıin paıdalanýǵa berý josparlanyp otyr. Nátıjesinde keler jylǵy vegetatsııalyq maýsymda 9,7 myń gektar jańa sýarmaly jer aınalymǵa engiziledi. Sonymen qatar Tólebı aýdanyndaǵy «Qaraqýys» sý qoımasynyń qurylysy bıyl aıaqtalyp, 350 gektar jer sýmen qamtamasyz etiledi.
– Aldaǵy jyldary Ordabasy jáne Saýran aýdandarynda «Boraldaı» jáne «Iqan sý» sý qoımalaryn salý kózdelgen. Jobalar iske asqan jaǵdaıda Bógen sý qoımasyna qosymsha 120 mln m³ aǵyn sý jetkizilip, Túrkistan qalasyndaǵy sý máselesin sheshýge múmkindik týady. Bıyl Islam damý bankiniń qarjysy esebinen sý sharýashylyǵy ınfraqurylymyn jańǵyrtý jumystary bastalady. Birinshi kezeńde «Qazsýshar» arqyly 63,2 mlrd teńgege 11 joba, «Turan sý» kásiporny arqyly 73,6 mlrd teńgege 14 joba iske asyrylady. Nátıjesinde 296 shaqyrym kanal betonmen qaptalyp, 63 myń gektardan astam sýarmaly jerdiń sýmen qamtamasyz etýi jaqsarady, – delingen oblystyq aýyl sharýashylyǵy basqarmasy usynǵan aqparatta.
Sý resýrstaryn tıimdi paıdalaný maqsatynda 2030 jylǵa deıin jańa tehnologııalardy engizý jospary bekitilgen. Josparǵa sáıkes, jyl saıyn 50 myń gektar alqapqa bul ádisterdi qoldaný arqyly 2030 jylǵa qaraı 622,8 mln m³ sýdy únemdeý kózdelip otyr.
Budan buryn Túrkistan óńiri qýańshylyqpen qalaı kúresip jatqanyn jazǵan edik.
