Túrkistan oblysynda 96 balaǵa tıesili 9 mln teńgege jýyq áleýmettik kómek tólenbeı kelgen
ASTANA. KAZINFORM — Túrkistan oblysy Otyrar aýdanynda erekshe qajettilikteri bar 96 balaǵa úsh jyl boıy áleýmettik kómek tolyq tólenbegen. Prokýratýranyń aralasýynan keıin balalardyń quqyqtary qalpyna keltirilip, bereshek óteldi.
Otyrar aýdanynyń prokýratýrasy aýdan ákimdiginiń jumyspen qamtý jáne áleýmettik baǵdarlamalar bóliminiń qyzmetine taldaý júrgizip, zań buzýshylyqty anyqtady.
Aýdandyq máslıhat sheshimi boıynsha І, ІІ jáne ІІІ toptaǵy 7-18 jas aralyǵyndaǵy múgedektigi bar balalarǵa aı saıyn 4 aılyq eseptik kórsetkish (AEK) mólsherinde áleýmettik kómek berilýge tıis.
Alaıda 2023-2025 jyldary 96 balaǵa belgilengen 4 AEK ornyna 3 AEK kóleminde ǵana tólem jasalǵan. Sonyń saldarynan balalardyń zańmen kepildendirilgen áleýmettik quqyqtary buzylǵan.
Prokýrorlyq qadaǵalaý aktisinen keıin zań buzýshylyq tolyq joıyldy. 96 balanyń quqyqtary qalpyna keltirilip, tólenbeı qalǵan 9 mıllıon teńgege jýyq qarajat tolyq óteldi.
Eske salaıyq, buǵan deıin Aqmola oblysynda mekeme 107 jumyskerge 2,1 mln teńge ústemaqysyn tólemeı kelgenin jazǵan edik.
