Túrkistan oblysynda 900-ge jýyq balanyń ata-anasy ekpe salýdan bas tartqan
TÚRKІSTAN. KAZINFORM – Túrkistan oblysynda balalaryn josparly vaktsınadan ótkizýden bas tartqan ata-analardyń sany artyp otyr. Bıyl óńirde mundaı 869 jaǵdaı tirkelgen.
Túrkistan oblysynyń sanıtarııalyq epıdemııalogııalyq baqylaý departamentiniń basshysy Nurbek Nyshanovtyń aıtýynsha, óńirde juqpaly aýrýlardyń aldyn alý jáne halyq densaýlyǵyn qorǵaý maqsatynda josparly ımmýndaý jumystary júrgizilip jatyr.
– Ulttyq egý kúntizbesine sáıkes 21 ınfektsııaǵa qarsy profılaktıkalyq ekpeler respýblıkalyq jáne jergilikti bıýdjet esebinen tegin júrgiziledi. Josparly vaktsınatsııa balalardyń belgili bir jas toptaryn qamtıdy. Sondaı-aq keıbir ınfektsııalarǵa qarsy eresekter ár 10 jyl saıyn qaıta egilýi tıis, – dedi spıker.
Resmı málimetke sáıkes, óńirde ótken jyldan beri jalǵasyp kele jatqan qyzylshaǵa qatysty qolaısyz epıdemıologııalyq ahýal bıyl da saqtalǵan. Byltyr oblysta qyzylshamen aýyrǵan 25 jaǵdaı tirkelse, olardyń barlyǵy balalar arasynda anyqtalǵan. Al bıyl syrqattanýshylar sany 47-ge jetken. Aýyrǵandardyń kóbi ekpe almaǵan turǵyndar.
Departament basshysy sanıtarlyq-aǵartý jáne túsindirý jumystary júrgizilgenine qaramastan, ata-analardyń vaktsınadan bas tartý kórsetkishi tómendemeı otyrǵanyn aıtty.
– Ótken jyly oblysta 14 jasqa deıingi balalar arasynda ekpeden bas tartýdyń 750-ge jýyq jaǵdaıy tirkelse, bıyl bul kórsetkish 869-ǵa jetti. Mundaı jaǵdaıda mamandar ata-analarmen túsindirý jumystaryn júrgizedi. Alaıda ekpeden bas tartý jaǵdaılary áli de kóp, – dedi Nurbek Nyshanov.
Spıkerdiń sózinshe, qazirgi ýaqytta kókjótel, A vırýsty gepatıti jáne polıomıelıt aýrýlarynyń tirkelý qaýpi joǵary. Oblysta jyl saıyn 14 jasqa deıingi 190 myń bala túrli juqpaly aýrýlarǵa qarsy josparly ekpe alady. Barlyq bala tirkelgen emdeý mekemeleri arqyly esepke alynǵan. Jalpy vaktsınatsııa ata-anasynyń kelisimimen ǵana júrgiziledi.
Budan buryn ShQO-da jyl basynan beri 100-den astam adam vaktsına saldyrýdan bas tartqany týraly jazǵan edik.
