Túrkistan oblysynda 9 tonnadan astam janarmaı tárkilendi

TÚRKІSTAN. KAZINFORM – Túrkistan oblysynda kedendik baqylaý barysynda birqatar zańbuzýshylyq anyqtaldy.

Túrkistan oblysy boıynsha Memlekettik kirister departamentiniń basqarma basshysy Aıdos Quralbaıulynyń aıtýynsha, jyldyń alǵashqy toqsanynda óńirde 3 esirtki tasymaldaý deregi tirkelgen.

– Sonymen qatar, munaı ónimderin zańsyz áketýdiń 29 deregi anyqtaldy. Nátıjesinde 1,58 mln teńgeden astam aıyppul salynyp, 9,6 tonna janarmaı tárkilendi. Budan bólek 12 200 AQSh dollaryn zańsyz áketý deregi tirkeldi, - dedi ol.

Vedomstvo málimetinshe, oblysta keden ınfraqurylymyn jańǵyrtý baǵytynda birqatar iri jobalar iske asyrylǵan. Atap aıtqanda, «Atameken», «Baýyrjan Qonysbaev» beketteri jańartylyp, «Qaplanbek» keden beketi qaıta iske qosylǵan. Al «Jibek joly» beketin bıyl tamyz aıynda paıdalanýǵa berý josparlanyp otyr.

Budan buryn Túrkistan oblysynda munaı ónimderin zańsyz shyǵarýdyń 260 deregi anyqtalǵanyn jazǵan edik.