Túrkistan oblysynda 89 jastaǵy patsıentke kúrdeli ota sátti jasaldy

TÚRKІSTAN. KAZINFORM - Ordabasy aýdandyq ortalyq aýrýhanasynda alǵash ret 89 jasar patsıentke jambas býynyn endoprotezdeý otasy jasaldy.

Naýqas 31 qańtar kúni turmystyq jaraqat alyp, jedel járdem brıgadasymen aýrýhananyń qabyldaý bólimine túsken. Dárigerler qaraýynan keıin sol jaq jambas býynyna tsementsiz bıpolıarly ımplantpen endoprotez otasy jasaldy. Ota sátti ótti. Qazir naýqastyń jaǵdaıy birqalypty.

Aýrýhana dárigerleriniń jańa emdeý ádisterin ıgerýi men kásibıliginiń arqasynda múgedektik qaýpi tóngen naýqas býyndaryndaǵy aýyrsynýy jeńildep, belsendi ómirge qaıta oralady. Bul joǵary tehnologııalyq operatsııa túri mindetti áleýmettik medıtsınalyq saqtandyrý júıesi sheńberinde júrgizildi.

Aıta keteıik, budan buryn 56 jastaǵy Shymkent turǵyny balasyna bir búıregin bergenin jazǵan bolatynbyz.