Túrkistan oblysynda 89 janarmaı quıý beketinde baǵany ósirý faktileri anyqtalǵan
TÚRKІSTAN. KAZINFORM – Qazirgi tańda oblysta jalpy syıymdylyǵy 119 myń tonnany quraıtyn 9 munaı saqtaý qoımasy jáne 380 janarmaı quıý beketi jumys isteıdi.
- 2025 jyldyń 16 qazanynan bastap baǵany turaqtandyrý maqsatynda AI-92 markaly benzın men dızel otynynyń baǵasyn kóterýge moratorıı engizildi. Janarmaı tapshylyǵyn boldyrmaý jáne baǵany turaqtandyrý boıynsha oblys kóleminde arnaıy jumysshy toptar qurylyp, kúndelikti baqylaý jumystaryn júrgizip jatyr. Nátıjesinde 89 janarmaı quıý beketinde baǵany ósirý faktileri anyqtalyp, baǵa qalypqa keltirildi. Sonymen qatar janar-jaǵarmaıdy kórshi elge zańsyz tasymaldaýdy toqtatý maqsatynda turaqty túrde reıdtik sharalar ótkizilýde. Jyl basynan munaı ónimderiniń zańsyz aınalymy boıynsha 247 fakt anyqtalyp, 10,4 mln teńgege aıyppul salyndy, - delingen oblys ákimdiginiń baspasóz qyzmeti taratqan resmı aqparatta.
Búginde Shymkent qalasyndaǵy munaı óńdeý zaýyty shtattyq rejımde jumys istep tur. Munaı saqtaý qoımalarynda AI-92 markaly benzınniń 12 507 tonna, AI-95 markaly benzınniń 1 296 tonna, dızeldik otynnyń 11 356 tonna qory bar. Óńirdegi janarmaı quıý beketterinde AI-92 markaly benzın jáne dızel otyny erkin bosatylýda, tapshylyq joq.
Sondaı-aq, 2025 jyldyń IV toqsanyna QR Energetıka mınıstrligi tarapynan óńirge 32505 tonna kóleminde suıytylǵan munaı gazy bólingen. Atap aıtqanda, qazan aıyna – 9 972 tonna, qarasha aıyna – 11 880 tonna, jeltoqsan aıyna – 12 600 tonna. Oblysta suıytylǵan munaı gaz taratýmen 50 kásipkerlik sýbektisi aınalysady. Al gaz quıý stantsııalarynyń sany – 314. Óńirde suıytylǵan munaı gazynyń baǵasy 1 lıtri 102-107 teńgeni quraıdy.
Osy jyldyń 15 qazanynan bastap oblystyń birqatar aýdanynda gaz tapshylyǵy baıqalǵan. Atyraý oblysyndaǵy gaz óńdeý zaýytynyń josparly jóndeý jumystaryna baılanysty, barlyq oblystarda gaz tapshylyǵy boldy. Saldarynan oblystyń gaz tutyný kólemi táýligine 450-500 tonnany qurasa, oblysqa zaýyttan shyǵatyn gaz kólemi 250-300 tonnaǵa deıin tómendegen.
Budan buryn Túrkistan oblysynda janar-jaǵarmaı beketi órtengenin jazǵan edik.