Túrkistan oblysynda 800 myń turǵyndy sapaly jaryqpen qamtıtyn «Qyzylásker» elektr stantsııasy ashyldy
Jańa nysan 5 aýdannyń halqyn sapaly ári úzdiksiz elektr qýatymen qamtýǵa múmkindik beredi, dep habarlaıdy Kazinform.
Keles aýdanynda qýaty 220/110/10 kV bolatyn óńirdegi eń úlken «Qyzylásker» elektr stantsııasy ashyldy. Bul strategııalyq nysannyń iske qosylýy uzaq jyldarǵa sozylyp, bıyl júzege asyp otyr. Saltanatty sharaǵa Túrkistan oblysynyń ákimi Darhan Satybaldy qatysyp, kópshilikti tarıhı sátpen quttyqtady.
«Oblysta energııany tutyný qarqyny jyldan-jylǵa artyp keledi. Osy baǵytta Túrkistan oblysynda jumys júrip jatyr. Sonyń biri – búgin iske qosylǵaly turǵan 220 kılovolttyq «Qyzylásker» qosalqy stantsııasy. Buǵan deıin oblystyń ońtústik bóliginde osyndaı qýattaǵy qosalqy stantsııanyń bolmaýyna baılanysty elektr qýaty normatıvtik talaptarǵa sáıkes kelmeıtin ári baǵasy qymbat edi. Sondyqtan beriletin elektr qýatynyń sapasyna keri áserin tıgizip, elektr jelilerindegi shyǵynyn kóbeıtetin. Endi bul másele sheshilip, 5 aýdannyń 800 myńǵa jýyq turǵyny sapaly qýat kózimen qamtylatyn boldy. Búgin «Qyzylásker» qosalqy stantsııasyn iske qosyp, aldaǵy jyldyń qańtar aıynda osy qosalqy stantsııadan qýat alatyn 110 kılovolttyq 91 shaqyrym elektr jelisin iske qosamyz» – dedi oblys ákimi.
Atalǵan elektr stantsııa arqyly 5 ońtústik aýdanda jaryq máselesi sheshiledi. Atap aıtqanda, jańa nysan Keles, Maqtaaral, Saryaǵash, Jetisaı jáne Shardara aýdandarynyń 800 myńǵa jýyq halqyn, áleýmettik, shaǵyn jáne orta bıznes nysandaryn sapaly ári úzdiksiz elektr qýatymen qamtýǵa múmkindik beredi.
