Túrkistan oblysynda 80 azamat memleketten alǵan qaıtarymsyz qarjyny maqsatsyz jumsap jibergen
Túrkistan oblysynda 80 azamat memleketten alǵan qaıtarymsyz qarjyny maqsatsyz jumsap jibergen. Bul týraly Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Asııa Temirbaeva málimdedi, dep habarlaıdy Kazinform.
Jańa bıznes ıdeıalardy júzege asyrýdy qoldaý maqsatynda memleket tarapynan berilgen qaıtarymsyz qarjyny maqsatty túrde paıdalanbaǵandar da bar. Máselen, ótken jyly Túrkistan oblysynyń 80 azamaty memlekettiń qarjysyn jeke maqsatqa jumsap jibergen. Sala mamandarynyń aıtýynsha qazir bıýdjet qarajaty tolyǵymen qaıtarylǵan. Al bıyl bul baǵytta talap kúsheıtilip otyr.
«Bıyl jańa bıznes ıdeıalardy júzege asyrýdy qoldaý maqsatynda 2,3 mlrd teńge qarjy qaralyp, oblys kóleminde 1 688 azamat memlekettik grant aldy. Bir orynǵa 27 adam qujat tapsyrdy. Grant alýshylardyń kópshiligi jańa ıdeıalarmen keldi. Nátıjesinde, kásip ashqan azamattar kóbeıip, ataýly áleýmettik kómek alýshylar sany azaıdy» - dedi Asııa Temirbaeva.
