Túrkistan oblysynda 8 myńnan astam kásipkerlik nysannyń 4,8 mlrd teńge salyq bereshegi bar
TÚRKІSTAN. KAZINFORM – Mıkro jáne shaǵyn bıznes ókilderi 31 naýryzǵa deıin salyq bereshegin tolyq ótegen jaǵdaıda eseptelgen ósimpul men aıyppul keshiriledi.
Túrkistan oblysy boıynsha Memlekettik kirister departamenti Bereshektermen jumys basqarmasynyń basshysy Merýert Ibragımovanyń aıtýynsha, Qarjy mınıstrliginiń buıryǵymen mıkro jáne shaǵyn kásipkerlik nysandary úshin salyq qaǵıdalary bekitilgen.
Atalǵan qaǵıdaǵa sáıkes, mıkro jáne shaǵyn kásipkerlik nysandarynyń 2026 jylǵy 1 qańtardaǵy jaǵdaı boıynsha salyq bereshegi tolyq ótelse, oǵan eseptelgen ósimpuldar men aıyppuldar esepten shyǵarylady.
– Qazirgi tańda Túrkistan oblysynda 8 435 mıkro jáne shaǵyn kásipkerlik nysannyń jalpy salyq bereshegi 4,8 mlrd teńgege jetken. Kásipkerler 31 naýryzǵa deıin bereshegin tolyq óteýi tıis. Osy jaǵdaıda memlekettik kirister organy úsh jumys kúni ishinde ósimpuldy esepten shyǵarý týraly sheshim qabyldaıdy. Bul sharalar jańa salyq kodeksine ótpeli kezeńde kásipkerlerge qoldaý kórsetý maqsatynda engizilgen, – dedi ol.
Spıkerdiń sózinshe, eger salyq bereshegi ótelmese, salyq organy banktik shottar men kassalar boıynsha shyǵys operatsııalaryn toqtata turý týraly ókim shyǵarady. Bul shara 20 jumys kúni ishinde bereshekti óteý nemese debıtorlyq bereshekti rastaý týraly habarlama oryndalmaǵan jaǵdaıda qoldanylady.
– Eger salyq bereshegi 20 AEK-ke deıin bolsa, salyq tóleýshige tek bereshektiń qalyptasqany týraly habarlama jiberiledi. 20-45 AEK aralyǵyndaǵy bereshek kezinde bereshekti óteý týraly habarlama joldanyp, banktik shottar men kassa boıynsha shyǵys operatsııalary toqtatylady. Al 45 AEK-ten asatyn bereshek bolsa, barlyq májbúrlep óndirý sharalary qoldanylady. Sonymen qatar 27 000 AEK-ten asatyn bereshek 3 aı ishinde ótelmese, sot sanktsııasy nemese elimizdiń aýmaǵynan shyǵýǵa ýaqytsha shekteý qoıylýy múmkin, – dedi Merýert Ibragımova.
Jeke tulǵalarǵa qatysty da naqty tártip belgilengen. Salyq bereshegi týyndaǵan jaǵdaıda bereshekti óteý týraly habarlama 20 jumys kúninen keshiktirilmeı joldanady. Eger talaptar 5 jumys kúni ishinde oryndalmasa, májbúrlep oryndatý úshin jeke sot oryndaýshylarynyń óńirlik palatasyna jiberiledi.
Budan buryn Túrkistan oblysynda 1,1 mlrd teńgeden astam qarajat bızneske qaıtarylǵanyn jazǵan edik.
