Túrkistan oblysynda 8 myńǵa jýyq adam JRVI juqtyrdy
TÚRKІSTAN. KAZINFORM – Túrkistan oblysynda 1 qazannan beri 8 myńǵa jýyq adam jiti respıratorlyq vırýstyq ınfektsııalarǵa (JRVI) shaldyqty. Olardyń 57 paıyzy – 14 jasqa deıingi balalar. Bul týraly oblystyq sanıtarııalyq-epıdemıologııalyq baqylaý departamenti basshysynyń mindetin atqarýshy Aqerke Erkinbekova málimdedi.
Onyń aıtýynsha, tumaý men JRVI-diń epıdemııalyq maýsymy 1 qazanda bastalyp, kelesi jyldyń sáýir aıynyń sońyna deıin jalǵasady. Osyǵan baılanysty óńirde ınfektsııanyń aldyn alý sharalary qolǵa alynǵan.
Bıyl oblys turǵyndaryn tumaýǵa qarsy vaktsınatsııalaý úshin Reseıde óndirilgen «Grıppol+» vaktsınasynyń 271 348 dozasy jetkizilgen. Bul óńir halqynyń 12,8 paıyzyn qamtýǵa múmkindik beredi.
– Qazirgi ýaqytta oblysta tumaýǵa qarsy vaktsınatsııalaý josparynyń 40 paıyzy oryndaldy. Atap aıtqanda, 15 myń medıtsına qyzmetkeri, júktiliktiń ekinshi jáne úshinshi trımestrindegi 8 myń áıel, sondaı-aq dıspanserlik esepte turatyn jáne sozylmaly aýrýlary bar balalar, qarttar men múgedektigi bar 80 myń azamat tumaýǵa qarsy ekpe aldy, – dedi Aqerke Erkinbekova.
Tumaýǵa qarsy profılaktıkalyq vaktsınatsııa halyqtyń osal toptaryna tegin júrgiziledi. Ekpe egý jumystary jeltoqsan aıyna deıin jalǵasady.
Buǵan deıin Túrkistan oblysynda 900-ge jýyq balanyń ata-anasy ekpe salýdan bas tartqanyn habarlaǵan edik.
