Túrkistan oblysynda 790 gramm salmaqpen týǵan sábı úıine shyǵaryldy
TÚRKІSTAN. KAZINFORM — Túrkistan oblysynda nebári 790 gramm salmaqpen dúnıege kelgen sábı 69 táýlik boıy dárigerlerdiń baqylaýynda boldy.
Qazyǵurt aýdanynyń turǵyny Jaına Iskakova júktiliktiń 27 aptasy 2 kúninde № 1 oblystyq perınataldyq ortalyǵyna aýyr jaǵdaıda túsken.
Dárigerler anasyna aýyr dárejeli preeklampsııa, platsentanyń tolyq jatýy jáne jatyrdaǵy burynǵy eki operatsııadan keıingi tyrtyq dıagnozdaryn qoıyp, ony turaqty medıtsınalyq baqylaýǵa alǵan.
— Medıtsınalyq kórsetkishterge baılanysty 2026 jylǵy 27 maýsymda merziminen buryn bosandyrý týraly sheshim qabyldanyp, salmaǵy 790 gramm, boıy 34 santımetr bolatyn er bala dúnıege keldi, — delingen oblystyq densaýlyq saqtaý basqarmasynyń habarlamasynda.
Nárestege Aıbyn esimi berildi. Ol 69 táýlik boıy perınataldyq ortalyqtyń dárigerleri men medıtsına qyzmetkerleriniń táýlik boıǵy baqylaýynda bolyp, qajetti em men medıtsınalyq kómek aldy.
3 qyrkúıekte sábıdiń salmaǵy 2100 gramǵa jetip, densaýlyq jaǵdaıy turaqtanǵan soń úıine shyǵarylyp, anasymen qaýyshty.
Buǵan deıin Túrkistanda 41 jastaǵy áıel úshemdi dúnıege ákelgenin jazǵan edik.
