Túrkistan oblysynda 76 shaqyrymnan astam kanal betondaldy

ASTANA. KAZINFORM – Túrkistan oblysynyń Túlkibas aýdanynda jalpy uzyndyǵy 108,7 shaqyrym bolatyn 13 kanalǵa rekonstrýktsııa jasaldy. Onyń ishinde 76,3 shaqyrymy betondaldy, 32,4 shaqyrymyna mehanıkalyq tazartý júrgizildi.

Sý resýrstary jáne ırrıgatsııa mınıstri Nurjan Nurjigitov jasalǵan jumystardyń nátıjesimen tanysty. Búginde kanalda árleý jáne tazalaý jumystary júrgizilip jatyr.

Sý resýrstary jáne ırrıgatsııa mınıstrligi málimetinshe, rekonstrýktsııa jumystarynyń nátıjesinde 8 632 gektar egis alqaby qaıta ıgerilip, aýdandaǵy jalpy sýarmaly alqap kólemi 16 832 gektarǵa jetedi.

Óńirge sapary aıasynda mınıstr Joǵarǵy Aqsý sý torabynyń jumysymen tanysty. Nysan Saıram aýdanynyń dıqandaryn sýarmaly sýmen qamtamasyz etedi. Búginde sý torabynan sekýndyna 7 tekshe metr sý jiberilip jatyr.

Nurjan Nurjigitov Saıram aýdanynyń dıqandarymen jáne «Turan sý» mekemesiniń qyzmetkerlerimen kezdesti. Vedomstvo basshysy elimizde sý sharýashylyǵyn damytý baǵytynda atqarylyp jatqan jumystar jóninde aıtyp berdi.

- Túrkistan oblysynyń dıqandaryn sýarmaly sýmen turaqty qamtamasyz etý úshin Báıdibek ata sý qoımasy salynyp jatyr. Nysan qoldanysqa berilgennen keıin Saıram aýdanynda sýarmaly sýmen qamtý máselesi tolyq sheshiledi. Degenmen sharýalar sý únemdeıtin júıelerge kóshýi kerek. Bul - zaman talaby. Elimizde sý únemdeý júıelerin satyp alý shyǵyny 80%-ǵa deıin óteledi. Uńǵyma qazý úshin de 80% sýbsıdııa qarastyrylǵan. Memleket tarapynan qoldaý bar, endi sony paıdalaný kerek, - dedi Sý resýrstary jáne ırrıgatsııa mınıstri Nurjan Nurjigitov.

Odan keıin mınıstr «Saıram-sý» sý bógetine bardy. Nysan Saıram-sý ózeniniń aǵynyn rettep, oń jáne sol jaǵalaý magıstraldyq kanaldary arqyly 8 760 gektar jerdi sýarmaly sýmen qamtamasyz etedi. Sondaı-aq «Toǵyz» sý qoımasyna qosymsha sý jiberedi.

Mınıstr Túrkistan oblysynyń «Qazsýshar» fılıalyna jańa arnaıy tehnıkalardyń kiltterin tabystaý rásimine qatysty. Jalpy alǵanda, fılıal 69 tehnıka aldy, onyń ishinde ekskavator-tıegishter, shynjyr tabandy ekskavatorlar, tirkemeler, sý tasyǵyshtar, samosvaldar, avtokran, tartqysh, aspaly jabdyq, dızeldi generator jáne t.b. bar. Fılıalǵa jalpy sany 133 tehnıka bólindi, endi qalǵany jyl sońyna deıin jetkiziledi.

Esterińizge sala keteıik, qazir «Qazsýshar» RMK fılıaldaryn búkil el boıynsha jańa jabdyqtarmen jaraqtandyrý jalǵasyp jatyr. Búgingi tańda kásiporyn fılıaldary josparlanǵan 757 arnaıy tehnıka men avtokóliktiń 439-yn aldy.

Aıta keteıik, Atyraýda kommýnaldyq menshikke alynǵan 9 kanalǵa ishnara jóndeý júrgizilip jatyr.