Túrkistan oblysynda 70,9 myń gektar jer memleketke qaıtaryldy

TÚRKІSTAN. KAZINFORM — Túrkistan oblysynda ortaq jaıylym jerdi qaıtarý jumysy qarqyndy júrip jatyr. Atalǵan saladaǵy máseleler oblys ákimi apparatynyń aptalyq májilisinde talqylandy.

Oblystyq jer qatynastary basqarmasynyń basshysy Erǵalı Tilegenniń aıtýynsha, oblystyń jer qory 11 mln 610,3 myń gektardy quraıdy. Óńirde paıdalanylmaı jatqan aýyl sharýashylyǵy maqsatyndaǵy jáne Qazaqstan Respýblıkasynyń zańnamasyn buza otyryp paıdalanyp jatqan jer telimderin qaıtarý boıynsha oblys ákiminiń ókimimen vedomstvoaralyq kishi toptyń quramy bekitilgen. 2024 jylǵa oblys boıynsha 60,0 myń ga jer ýchaskelerin memleket menshigine qaıtarý josparlanǵan.

Esepti merzimde 70,9 myń ga jer ýchaskeleri memleket menshigine qaıtaryldy. Óńirde 2023 jyldyń basynda jaıylym tapshylyǵy 2122,2 myń gektardy quraǵan bolatyn. Atqarylǵan jumystar nátıjesinde jaıylym tapshylyǵy tómendep, 2024 jyly 608 myń gektar boldy. 

Jıynda Túrkistan oblysynyń ákimi Nuralhan Kósherov jaıylym jerdi qaıtarý jumystaryn jandandyrýdy tapsyrdy. 

— Memleket basshysy ortaq jaıylymdardy el ıgiligine qaıtarý mindetin júktegeni belgili. Aýdan, qala ákimderi jaýapty basqarma men departamentpen birigip, osy baǵyttaǵy jumysty jandandyryńyzdar. Maqsatsyz paıdalanylyp jatqan jerdi qaıtarý isi júıeli túrde júrgizilsin. Kosmomonıtorıng nátıjelerin de nazarǵa alyp, saraptaǵan jón. Monıtorıng, zerdeleý, halyqqa túsindirý jumystary toqtamaýy tıis, — dedi Nuralhan Kósherov.

Eske sala keteıik, buǵan deıin Túrkistan jylyjaıynda banan ekinshi ret jemis bergenin jazǵan edik.