Túrkistan oblysynda 700-den astam tik drenaj uńǵyma qalpyna keltiriledi
ASTANA. KAZINFORM - Túrkistan oblysynda jerdiń melıoratsııalyq jaǵdaıyn jaqsartý jáne sý resýrstaryn tıimdi paıdalaný maqsatynda 734 tik drenaj uńǵymany qalpyna keltirý jáne jańǵyrtý boıynsha keshendi baǵdarlama júzege asyrylyp jatyr.
QR Sý resýrstary jáne ırrıgatsııa mınıstrliginiń habarlaýynsha, jumystar Jetisaı, Maqtaaral, Saýran jáne Shardara aýdandaryn qamtıdy.
Islam damý bankiniń qoldaýymen Jetisaı aýdanynda 210, Shardara aýdanynda 302 uńǵymada qurylys-montaj jumystary júrgizilip jatyr. Irrıgatsııalyq jáne drenaj júıelerin jetildirý jobasynyń ekinshi fazasy aıasynda Maqtaaral aýdanynda 150, al Saýran aýdanynda 72 uńǵymany rekonstrýktsııalaý jumystary jalǵasady. Sonymen qatar Ordabasy aýdanynda 11 jáne Otyrar aýdanynda 42 uńǵymany qalpyna keltirýge jobalaý-smetalyq qujat ázirleý josparlanǵan. Budan bólek, 2020 jyly Túrkistan fılıalynyń qaramaǵyna 57 tik drenaj uńǵyma berilgen bolatyn. Búginde olardyń 30-y qalpyna keltirildi. Jyl sońyna deıin taǵy 10 uńǵymany jóndeý aıaqtalady, qalǵan 17-si kelesi jyly qalpyna keltiriledi.
Tik drenaj júıeleri jerasty sýynyń deńgeıin turaqtandyrýda, topyraqtyń qaıta tuzdaný qaýpin azaıtýda jáne sýarmaly jerlerdiń jaǵdaıyn jaqsartýda mańyzdy ról atqarady.
- Sońǵy jyldary Túrkistan oblysyndaǵy jerlerdiń melıoratsııalyq turaqtylyǵyn qamtamasyz etýde tik drenajdyń mańyzy aıtarlyqtaı artty. Osyǵan baılanysty óńirde drenaj uńǵymalaryn qalpyna keltirý jáne jańǵyrtý boıynsha aýqymdy jumystar júrgizilip jatyr. Bul sharalar sý resýrstaryn utymdy paıdalanýǵa jáne agrarlyq sektordyń turaqty damýyna baǵyttalǵan. Qazirgi ýaqytta oblystyń Jetisaı, Maqtaaral jáne Ordabasy aýdandarynda 380 tik drenaj uńǵyma jumys isteıdi, - dedi Sý resýrstary jáne ırrıgatsııa vıtse-mınıstri Erbolat Ibraıhanov.
Osyǵan deıin Sý resýrstary salasynda ÚEU-men yntymaqtastyqty damytýǵa arnalǵan jańa keńes qurylǵany týraly jazdyq.