Túrkistan oblysynda 700-den astam qoǵamdyq tamaqtaný nysanynyń tıisti ruqsat qujaty bolmaǵan
TÚRKІSTAN. KAZINFORM – Óńirde sanıtarııalyq-gıgıenalyq baqylaý barysynda josparlanǵan 42 nysannyń 29-y tekserildi. Nátıjesinde 20 aıyppul salynyp, olardyń jalpy somasy 8,7 mln teńgeden asty.
Búginde Túrkistan oblysynda halyqtyń 95,8 paıyzy ortalyqtandyrylǵan aýyzsýmen qamtylǵan. Degenmen Saryaǵash jáne Keles aýdandarynda 22 myńnan astam turǵyn áli de tasymal sýǵa táýeldi.
Oblystyq sanıtarııalyq-epıdemıologııalyq baqylaý departamentiniń málimetinshe, óńirdegi 588 ortalyqtandyrylǵan sý júıesiniń 146-sy sanıtarııalyq-epıdemıologııalyq qorytyndysyz jumys istep jatyr. Onyń eń kóbi Tólebı aýdanynda – 35, Túlkibasta – 34 jáne Saryaǵashta – 23.
– Jyldyń alǵashqy alty aıynda qorshaǵan orta monıtorıngi barysynda aýyzsý sapasyna zertteý júrgizildi. Sanıtarııalyq-hımııalyq kórsetkishter boıynsha alynǵan synamalardyń 7,2 paıyzy talapqa saı kelmeıtini anyqtaldy. Mundaı jaǵdaılar Jetisaı, Shardara aýdandarynda jáne Túrkistan qalasynda tirkeldi. Al mıkrobıologııalyq kórsetkishter boıynsha synamalardyń 2,2 paıyzy belgilengen normalarǵa sáıkes kelmegen. Bul kórsetkish Shardara, Saýran jáne Keles aýdandarynda joǵary, – delingen vedomstvo aqparatynda.
Sondaı-aq oblysta 33 mektep, 3 mektep-ınternat jáne 2 mektep ashanasynyń sanıtarııalyq-epıdemıologııalyq qorytyndysyz jumys istep jatqany belgili boldy. Onyń ishinde Keles aýdanynda – 11, Jetisaıda – 7, Saryaǵashta 5 mektep bar. Departament málimetinshe, atalǵan zań buzýshylyqtar jańa oqý jyly bastalǵanǵa deıin tolyq joıylýy tıis.
Budan bólek qoǵamdyq tamaqtaný salasynda baqylaýda turǵan 1513 nysannyń jartysyna jýyǵynda, ıaǵnı 714-inde tıisti ruqsat qujattary joq. Ásirese epıdemıologııalyq mańyzy joǵary toıhanalar men qoǵamdyq tamaqtaný oryndarynyń birqatary sanıtarııalyq-epıdemıologııalyq qorytyndysyz jumys istep jatqany anyqtalǵan.
– Memlekettik tapsyrys aıasynda saýda oryndarynan 908 ónim synamasy satyp alynyp, zertteldi. Onyń 65-inen nemese 7,2 paıyzynan tehnıkalyq reglament talaptaryna sáıkessizdik anyqtaldy. Negizgi buzýshylyqtar ónimniń tańbalanýy men mıkrobıologııalyq kórsetkishterine qatysty boldy. Talapqa sáıkes kelmeıtin qus eti, daıyn aspazdyq ónimder jáne jeńil ónerkásip taýarlary saýdadan alyndy, – dep habarlady oblystyq sanıtarııalyq-epıdemıologııalyq baqylaý departamenti.
Buǵan deıin Túrkistanda adamdar sýshıdan ýlanǵan kafe qaıtadan zańsyz jumys istegenin jazǵan edik.
