Túrkistan oblysynda 65 shaqyrymǵa jýyq ırrıgatsııalyq kanal tazalanyp jatyr
ASTANA.KAZINFOFM - Jetisaı aýdanynda jańa arnaıy tehnıka kómegimen 65 km-ge jýyq ırrıgatsııalyq kanaldy keshendi tazalaý bastaldy.
Cý resýrstary jáne ırrıgatsııa mınıstrligi málimetinshe, 2026 jylǵy vegetatsııa kezeńinde sýarý sýyn jetkizýdi jaqsartý maqsatynda «Qazsýshar» RMK Túrkistan fılıaly óńirdegi ırrıgatsııalyq kanaldardy mehanıkalyq ádispen tazartý jumystaryn júrgizip jatyr. Túrkistan fılıalynyń Jetisaı óndiristik ýchaskesinde uzyndyǵy 64,9 shaqyrym bolatyn kanaldar tazartylyp jatyr. Búginge deıin onyń 29 shaqyrymy tazartyldy. Jumysqa 10-nan astam arnaıy tehnıka jumyldyrylǵan.
Atap aıtqanda, úsh aýyldyq okrýgtaǵy 18,86 myń gektar jerdi sýarý sýymen qamtamasyz etetin K-21 kanalynyń 18 km ýchaskesi tazalanyp jatyr. Qazirgi ýaqytta 10 km ýchaske tolyq tazalanǵan. Jumystarǵa paıdalanylyp jatqan úsh ekskavator tazalaýdy úzdiksiz júrgizýge múmkindik berip otyr. Sondaı-aq 10 myń ga sýarmaly jerdi sýmen qamtamasyz etetin K-34 kanalyn mehanıkalyq tazartý júrgizilip jatyr. Nysannyń jalpy uzyndyǵy – 18,5 shaqyrym. Qazir shamamen 4 shaqyrymy tazartyldy.
«Qazsýshar» RMK Túrkistan fılıaly GNS-1 nasos stantsııasyna sý berý turaqtylyǵyn qamtamasyz etý úshin «Mashkanal» (Mashınalyq ádispen sý kóterý kanaly) bas qurylysyn qum men laıdan tazartý jumystaryn da júrgizip jatyr. Bul jumystarǵa 5 arnaıy tehnıka jumyldyrylǵan. Tazartý protsesin 10-15 kún ishinde aıaqtaý josparlanǵan. Sonymen qatar GNS-1 stantsııasyndaǵy 8 nasos agregatyn jóndeýge daıyndyq júrgizilip jatyr. Budan bólek, fılıal Jetisaı aýdanyndaǵy ishki sharýashylyq kanaldaryn da mehanıkalyq tazalaýdy kózdep otyr.
- Vegetatsııa kezeńi barysynda osy nysandardyń barlyǵynda sýdy jetkizýge qatysty qıyndyqtar anyqtaldy. 2026 jylǵy sýarý maýsymynda osyndaı máselelerdiń aldyn alý úshin aldymen tazartý jumystary júrgizilip, keıin jóndeý jáne betondaý jumystary iske asyrylady. Tazartý barysyn Sý resýrstary jáne ırrıgatsııa mınıstrliginiń mamandary baqylaýda jáne vedomstvo usynǵan jańa tehnıka men avtokólik belsendi paıdalanylyp jatyr, – dedi Sý resýrstary jáne ırrıgatsııa mınıstrliginiń ókili Nurmuhammed Nııazbekov.
Aıta keteıik, Jetisý oblysynda 9 kanal rekonstrýktsııalanyp jatyr.