Túrkistan oblysynda 6 jasar qyzdy 9 synyp oqýshysy zorlamaq boldy degen málimet tarady
TÚRKІSTAN. KAZINFORM – Áleýmettik jelide Túrkistan oblysynda 6 jasar qyzǵa 9 synyp oqýshysynyń zorlyq jasaýǵa áreket etkeni týraly aqparat tarady.
Jelide taraǵan málimetke sáıkes, oqıǵa Otyrar aýdanyndaǵy aýyldardyń birinde bolǵan.
Qyzdyń anasynyń aıtýynsha, joǵary synyp oqýshysy tarapynan alty jasar búldirshinge jasalǵan zorlyq áreketiniń belgisi bolǵanymen, kúdikti áli kúnge deıin qamaýǵa alynbaǵan.
Osyǵan qatysty Túrkistan oblysy polıtsııa departamenti Kazinform tilshisine resmı túsinik berdi.
Vedomstvo málimetinshe, atalǵan fakti boıynsha sotqa deıingi tergeý amaldary júrgizilip, turǵynnyń barlyq ýájderi tekserilip jatyr.
– Bastapqy tergeý is-sharalarynyń nátıjeleri boıynsha kámeletke tolmaǵan qyzǵa qatysty quqyqqa qaıshy is-áreketter anyqtalmady. Qazirgi tańda sotqa deıingi tergep-tekserý jumystary júrip jatyr. Qorytyndysy boıynsha qoldanystaǵy zańnamaǵa sáıkes protsestik sheshim qabyldanady, – dep habarlady oblystyq PD baspasóz qyzmeti.
Sonymen qatar, tergeý múddesine baılanysty ózge aqparattar jarııa etilmeıtini naqtylandy.
Budan buryn Shymkentte oqýshy qyzǵa azǵyndyq áreket jasady degen kúdikpen mektep muǵalimi qamaýǵa alynǵanyn jazǵan edik.
