Túrkistan oblysynda 6 myńnan astam adam janýarlardan jaraqattanǵan

TÚRKІSTAN. KAZINFORM – Ótken jyly óńirde 50 000 astam qańǵybas ıt pen mysyq aýlandy aýlandy.

Ótken jyly Túrkistan oblysynda 6425 adam túrli janýarlardan jaraqat alǵan. Onyń ishinde 5310 adamdy ıt tistese, 694 adam mysyqtan, 46 azamat iri qara malynan zardap shekken. Degenmen, óńirde qutyrý aýryna shaldyǵý jaǵdaıy tirkelgen joq.

Oblystyq veterınarııa basqarmasynyń málimetine súıensek, ótken jyly 49 996 bas qańǵybas ıt pen 1798 mysyq aýlanǵan. Al, bıylǵy jyly 41 280 qańǵybas ıt pen mysyqty aýlap, joıý is-sharalary júzege aspaq.

Epıdemıolog mamandar adamdardyń ómiri men densaýlyǵyna qaýip tóndirmes úshin, qoldaǵy janýarlardy ýaqtyly mal dárigerlerine kórsetip, aýrýǵa qarsy vaktsına saldyrý kerektigi týraly keńes beredi. Eń bastysy, minezinde ózgerister baıqalǵan janýarlardy adamdardan aýlaq ustaý kerek.

«Qutyrý aýrýynyń vırýsy aýrý janýarlardan tisteý, tyrnaý kezinde silekeı arqyly adamnyń teri qabatyna enedi. Sosyn júıke talshyqtary men julyn mıyna jetken vırýs adam ómirine qaýip tóndiredi. Qutyrý aýrýyna shaldyqqan adamnyń dene qyzýy kóterilip, tynys alý men jutynýy qıyndaıdy. Naýqas sýdy kórgende nemese ony oılaǵan kezde jutqynshaq pen kómekeıdiń spazmalary ashylyp, aýanyń qozǵalysynan, jaryq shamynyń áserinen, qatty daýys, shýyldyń áserinen ustamalary ustaı bastaıdy», - dedi oblystyń Bas memlekettik sanıtarlyq dárigeri Nurbek Nyshanov.

Aıta keteıik, 2022 jyly aıaǵyn ıt tistegen 14 jasar bala ýaqtyly em-dom almaýdyń saldarynan araǵa bir jyl salyp kóz jumǵan bolatyn.