Túrkistan oblysynda 583 mln teńge jymqyrǵan bilim bólimi qyzmetkerlerine úkim shyqty

TÚRKІSTAN. KAZINFORM – Túrkistan oblysy Baıdibek aýdandyq bilim bóliminiń laýazymdy tulǵalaryna qatysty bıýdjet qarajatyn júıeli túrde jymqyrý deregi boıynsha sot úkimi shyqty, dep habarlaıdy Kazinform.

Tergeýdi Qarjylyq monıtorıng agenttigi Túrkistan oblysy boıynsha departamenti júrgizgen.

Іs materıaldaryna sáıkes, basshylar, býhgalterler men ekonomısterdi qosa alǵanda 18 laýazymdy tulǵa jalaqy jáne ózge de tólemderge arnalǵan bıýdjettik ótinimderdi negizsiz ulǵaıtý arqyly aýdannyń 49 jalpy bilim beretin mektebiniń qarajatyn ıemdený shemasyn uıymdastyrǵan.

Býhgalterııa qyzmetkerleri elektrondyq júıelerge ádeıi jalǵan málimetter engizip otyrǵan. Tólem vedomostary men esep paraqtaryna is júzinde jumys istemegen adamdar tirkelgen nemese jalaqy men ústemeaqylar kólemi negizsiz kóbeıtilgen.

- Operatsııalarǵa zańdy sıpat berý úshin qyzmettik jazbalar, buıryqtar, esep vedomostary men jumys ýaqyty tabelderi sııaqty jalǵan qujattar paıdalanylǵan. Qujattardyń bir bóligi tólemder júrgizilgennen keıin keri kúnmen rásimdelgen nemese esepti sáıkestendirý maqsatynda túzetilgen.

Qarajat jalǵan tulǵalardyń, onyń ishinde týystary men tanystarynyń banktik shottaryna aýdarylyp, keıin aldyn ala kelisilgen úlester boıynsha qatysýshylar arasynda bólingen, - delingen aqparatta.

Nátıjesinde memleketke keltirilgen zalal 583 mln teńgeden asqan.

Tergeý barysynda kúdiktiler keltirilgen shyǵyndy tolyq ótegen.

Sot úkimimen 14 adam 3 jyldan 7 jylǵa deıin bas bostandyǵynan aıyryldy. Taǵy 4 adamǵa qatysty is raqymshylyqqa baılanysty toqtatyldy.

Úkim zańdy kúshine endi.

Aıta keteıik, Túrkistan oblysynda zańsyz snıýs óndiretin úsh jasyryn tseh joıyldy.