Túrkistan oblysynda 5700-den astam qyzmetkerge MÁMS jarnalary tólenbegen
TÚRKІSTAN. KAZINFORM — Túrkistan oblysynda birqatar uıym 5 706 qyzmetker úshin MÁMS jarnalaryn tólemegen. Sondaı-aq óńirde 306 myńnan astam turǵyn medıtsınalyq saqtandyrý júıesinen tys qalyp otyr.
«Áleýmettik medıtsınalyq saqtandyrý qory» Túrkistan oblystyq fılıalynyń málimetinshe, búginde óńirde medıtsınalyq uıymdarǵa 2 085 921 turǵyn tirkelgen.
Onyń ishinde 1 779 672 adam nemese 85,3 paıyzy MÁMS júıesinde saqtandyrylǵan. Al 306 249 turǵyn (14,7%) saqtandyrylmaǵan. Medıtsınalyq saqtandyrýdan tys qalǵan azamattardyń 247 945-i nemese 80 paıyzy aýyldyq jerde turady.
Taldaý nátıjesine sáıkes, qańtar jáne shilde aılarynda saqtandyrylmaǵan azamattar sanynyń artýy baıqalady. Buǵan jumys berýshiler, jeke kásipkerler, sharýa qojalyqtary jáne azamattyq-quqyqtyq shart negizinde jumys isteıtin tulǵalardyń alty aıǵa aldyn ala tólegen MÁMS jarnalary merziminiń aıaqtalýy áser etedi.
— Sonymen qatar oblystaǵy myńnan astam bilim berý uıymynda 80 myńnan astam qyzmetker eńbek etedi. Keıbir uıymdarda uzaq merzimdi eńbek demalysy kezinde qyzmetkerler úshin MÁMS jarnalarynyń ýaqytyly tólenbeýi olardyń saqtandyrylǵan mártebesinen aıyrylýyna sebep bolyp otyr. Budan bólek qyzmetkerler týraly málimetterdiń aqparattyq júıelerge der kezinde engizilmeýi jáne jeńildik beriletin 14 sanat boıynsha derekterdiń ýaqtyly jańartylmaýy da saqtandyrý mártebesiniń ózgerýine yqpal etedi, — delingen habarlamada.
Resmı málimetke sáıkes, qazirgi tańda oblysta jumyspen qamtylmaǵan 177 413 azamat saqtandyrylmaǵan. Bul ótken kezeńmen salystyrǵanda 13 059 adamǵa kóp.
Sondaı-aq birqatar uıym 5 706 qyzmetker úshin MÁMS jarnalaryn tólemegen. Memlekettik kirister komıteti MÁMS boıynsha bereshekti óteý maqsatynda jeke kásipkerlerge, jeke praktıkamen aınalysatyn tulǵalarǵa jáne memlekettik mekemelerge jeke kabınetteri arqyly habarlamalar joldaıdy. Habarlama jiberilgennen keıin 30 kún ishinde bereshek ótelmegen jaǵdaıda, zańnamaǵa sáıkes esepshottarǵa shekteý qoıylýy múmkin.
Buǵan deıin Túrkistan oblysynda 287 myńnan astam adam MÁMS aıasynda saqtandyrylmaǵany týraly jazǵan edik.
