Túrkistan oblysynda 530 myń gektardan astam qoǵamdyq jaıylym tapshy
TÚRKІSTAN. KAZINFORM — Oblysta 1 500-den astam jer paıdalanýshynyń 302,4 myń gektar jerdi maqsatyna saı paıdalanbaǵany anyqtaldy.
Túrkistan oblysynyń jalpy jer qory — 11 mln 610,3 myń gektar. Onyń 4 mln 527,3 myń gektary — aýyl sharýashylyǵy maqsatyndaǵy jer.
Oblystyq jer qatynastary basqarmasynyń basshysy Erǵalı Tilegenniń aıtýynsha, óńirde aýyl sharýashylyǵy maqsatyndaǵy jerlerdi memleket menshigine qaıtarý eki baǵytta júrgizilip jatyr.
— Aldymen mınıstrlik tarapynan bekitilgen jospar boıynsha ótken jyly 129,9 myń gektar jer telimi memleket menshigine qaıtaryldy. Ekinshi baǵyt boıynsha óńirde aýyl sharýashylyǵy keshenin zerdeleý maqsatynda arnaıy jumysshy top quryldy. Júrgizilgen taldaý nátıjesinde aýdan, qala ákimdikteri boıynsha 3 960 jer paıdalanýshynyń 372,6 myń gektar jaıylym jerinde mal basy tirkelmegeni anyqtaldy. Sonyń nátıjesinde 225,2 myń gektar jer memleket menshigine qaıtaryldy. Bıyl 187,3 myń gektar jaıylym jerdi memleket menshigine qaıtarý baǵytynda tıisti jumystar júrgizilip jatyr, — dedi Erǵalı Amankeldiuly.
Spıkerdiń sózinshe, aýdan jáne qala ákimdikteri boıynsha 1 542 jer paıdalanýshynyń 302,4 myń gektar jerdi maqsatyna saı paıdalanbaǵany anyqtalǵan. Osyǵan baılanysty olarǵa tıisti habarlamalar joldanǵan.
Sonymen qatar eldimekenderdi qoǵamdyq jaıylymmen qamtamasyz etý maqsatynda 2021-2025 jyldar aralyǵynda oblysta 1 mln 176 myń gektar jaıylym jer memleket menshigine qaıtaryldy. Onyń ishinde 950,3 myń gektar jaıylym aýyldyq okrýg ákimdikterine qoǵamdyq jaıylym retinde paıdalanýǵa berilgen.
Vedomstvo málimetinshe, qazirgi tańda oblysta eldimekenderdegi qoǵamdyq jaıylym tapshylyǵy 531,1 myń gektarǵa jetip otyr.
Jaıylym tapshylyǵy baıqalatyn Jetisaı jáne Maqtaaral aýdandaryn qoǵamdyq jaıylymmen qamtamasyz etý maqsatynda Shardara orman qory aýmaǵynan 100 myń gektar jer usynylǵan.
Budan buryn Túrkistan oblysynda aýyl ákimderiniń jer boıynsha sheshimderinen zań buzý anyqtalǵanyn jazǵan edik.
