Túrkistan oblysynda 500-ge jýyq pırotehnıkalyq buıym tárkilendi

TÚRKІSTAN. KAZINFORM – Óńirde júrgizilgen reıdtik shara barysynda zańsyz saýda jasaǵan 80-nen astam ákimshilik quqyq buzýshylyq anyqtaldy. 500-ge jýyq sáıkestik sertıfıkaty joq pırotehnıkalyq buıym tárkilenip, zańsyz saýda jasaýshylarǵa 3 mln 784 myń teńge kóleminde aıyppul salyndy.

Jańa jyl merekesi kezinde qoǵamdyq qaýipsizdikti saqtaý, azamattardyń jaraqat alýyna jol bermeý maqsatynda respýblıka kóleminde «Pırotehnıka» jedel profılaktıkalyq sharasy ótýde. Basty maqsat - pırotehnıkalyq buıymdardy satyp alý, saqtaý, paıdalaný, tasymaldaý, sondaı-aq kámeletke tolmaǵandarǵa satýǵa tyıym salý qaǵıdasyn qalyptastyrý. 

«Sharanyń birinshi eskertý kezeńi 5-12 jeltoqsan kúnderi aralyǵynda ótkizildi. Onda polıtsııa departamentiniń qyzmetkerleri oblysymyzdyń qala-aýdandarynda ornalasqan saýda ortalyqtary men dúkenderge arnaıy baryp qaǵaz túrinde eskertpeler taratty. Jeke kásipkerlerdiń arnaıy lıtsenzııasyz pırotehnıkalyq buıymdardy satýyna, saqtaýyna, tasymaldaýyna tyıym salynatyny aıtyldy. Ekinshi kezeń 20 jeltoqsan-3 qańtar aralyǵynda ótedi»- dedi Túrkistan oblysy polıtsııa departamentiniń jergilikti polıtsııa qyzmeti basqarmasy bastyǵynyń orynbasary Erlan Asqarov.

Aıta keteıik, budan buryn SQO-da zańsyz saýdadan 500-den astam pırotehnıkalyq ónim alynǵan bolatyn.