Túrkistan oblysynda 50 myń gektar alqaptaǵy egin oraqqa ilinbeı qalýy múmkin

TÚRKІSTAN. KAZINFORM – Qýańshylyq 336 sharýany tyǵyryqqa tirep otyr.

Túrkistan oblysynda uzaqqa sozylǵan qýańshylyq pen aǵyn sý tapshylyǵy saldarynan egin alqaptarynyń biraz bóliginde ónim ónbeı qalýy múmkin. Qazirgi esep boıynsha, 50 myń gektardan astam tálimdik jerge egilgen daqyldar tolyq boı kótermeı, sharýalardyń eńbegi esh ketý qaýpi bar. Bul jaǵdaı 336 sharýanyń jumysyna tikeleı áser etip otyr.

Oblysta aǵyn sý tapshylyǵy jyl saıyn artyp keledi. Mamandar bıylǵy maýsymnyń erekshe qurǵaq ári jaýyn-shashynsyz bolǵanyn atap ótti. Sonyń saldarynan óńirdegi negizgi ózenderden keletin sý kólemi azaıǵan. 

– Bıylǵy jyly aýa-raıynyń jaýyn-shashynsyz qurǵaq bolýyna baılanysty, aǵyn sý tapshylyǵy oryn alýy qaýiptiligi joǵary bolyp tur. Jalpy oblysqa jyldyq qajetti lımıt 4,8 mlrd. tekshe metr bolyp bekitilgen. Osy oraıda, sharýa qojalyqtarǵa aǵyn sýdy tıimdi rettep berý, aýyl sharýashylyǵy daqyldarynyń joıylýyna jol bermeý maqsatynda sý berý kestesi túzilip, aýdan, qala ákimdikterimen jumystar júrgizildi. Sharýalarǵa túsindirildi. Olardyń kelisimimen keste bekitilip, aǵyn sý kezektilik tártibimen bosatylyp jatyr, - dedi oblys ákiminiń orynbasary Nurbol Turashbekov. 

Búginde óńirdegi sharýalar aǵyn sýdy kezekpen tutynyp keledi. Belgili bir ýaqytqa keıbir aýdandarǵa sý berý ýaqytsha toqtatylyp, ózge óńirlerge baǵyttalady. Máselen, 20 maýsym men 1 shilde aralyǵynda Saıram aýdanynda sý berý toqtaǵan, al bul kezde Otyrar aýdanyna sý jiberiledi. Shildeniń basynda, kerisinshe, Saıram men Saýran aýdandaryna qaıta sý berilip, basqa aýdandarǵa ýaqytsha toqtatylady.

Jalpy, oblystaǵy sýarmaly jer kólemi 552 myń gektarǵa jetip otyr. Budan bólek, tálimdik alqaptarda 360 myń gektarǵa bıdaı, arpa jáne maqsary egilgen. Alaıda tabıǵı ylǵaldyń az bolýyna baılanysty bul jerlerde de ónimniń shyqpaýy múmkin.

Sý tapshylyǵy ásirese Saryaǵash, Keles, Qazyǵurt, Maqtaaral jáne Jetisaı aýdandarynda qatty sezilýde. Qazirgi tańda oblystaǵy negizgi magıstraldy kanaldar arqyly aǵyn sý kólemi ótken jylmen salystyrǵanda aıtarlyqtaı azaıǵan. Mysaly, «Dostyq» kanaly arqyly bıyl sekýndyna 28,6 tekshe metr ǵana sý kelip jatyr. Byltyr bul kórsetkish 38,8 bolǵan.

Oblys ákiminiń orynbasary aldaǵy ýaqytta jańa sý qoımalaryn salý arqyly máseleni sheshýdi kózdep otyr. Atap aıtqanda, «Báıdibek ata» jáne «Boraldaı» sý qoımalarynyń qurylysy tolyq júzege asqanda, óńirdegi «Bógen» sý qoımasyna qosymsha 113 mln tekshe metr sý jetkiziledi dep kútilip otyr. 

Qýańshylyqtan zardap shekken sharýalarǵa qoldaý kórsetý úshin oblystyq deńgeıde arnaıy jumys toby quryldy. Sharýalardyń nesıelerin shegerý jáne qarjylyq kómek kórsetý boıynsha mınıstrlikke usynystar da joldanǵan.

Aıta keteıik, budan buryn Túrkistan oblysynda uzaqqa sozylǵan qýańshylyq saldarynan egistik alqaptary kúıip, sharýalar shyǵynǵa batyp jatqanyn jazǵan bolatynbyz.