Túrkistan oblysynda 5 myń basqa arnalǵan bordaqylaý kesheni iske qosyldy
TÚRKІSTAN. KAZINFORM – Túrkistan oblysynyń Saıram aýdanynda bordaqylaý alańy men et kombınatynyń qurylys jobasy «KAZ ECO MEAT» JShS tarapynan júzege asyryldy. Bul týraly Aýyl sharýashylyǵy mınıstrligi habarlady.
Jylyna 10 myń tonnaǵa deıin et óńdeýge baǵyttalǵan jobanyń jalpy quny – 8,5 mlrd teńge.
Kásiporyn Belarýs, Qytaı jáne Túrkııadan jetkizilgen zamanaýı jabdyqtarmen jabdyqtalǵan. Óndiristiń barlyq kezeńinde ozyq tehnologııalyq sheshimder engizilgen. Mal bordaqylaý úderisin tıimdi jáne turaqty júrgizýge múmkindik beretin avtomattandyrylǵan azyqtandyrý júıesi ornatylǵan.
Ónimdi keshendi óńdeý maqsatynda qan jınaý jáne óńdeý qondyrǵylary, sondaı-aq súıek óńdeýge arnalǵan jabdyqtar iske qosylyp, qaldyqsyz óndiris tsıkli qamtamasyz etilgen.
Et kombınaty halyqaralyq sapa standarttaryna sáıkes keledi jáne ónim eksporttaýǵa baǵyttalǵan. Shıkizat retinde jergilikti fermerlik sharýashylyqtardan, sondaı-aq elimizdiń soltústik óńirlerinen jetkizilgen iri qara maly paıdalanylady.
Eske salsaq, buǵan deıin Túrkistan oblysynda alǵash ret 32 myń gektar jerge tamshylatyp sýǵarý júıesi engizilgenin habarlaǵan bolatynbyz.