Túrkistan oblysynda 48 otbasy baspanaly boldy
ASTANA. KAZINFORM – Sozaq aýdanynda áleýmettik turǵydan osal toptaǵy azamattarǵa arnalyp salynǵan jańa baspanalardyń qurylysy aıaqtalyp, el ıgiligine paıdalanýǵa tapsyryldy. Búgin sozaqtyq 48 otbasy jańa baspanalarynyń kiltterin aldy. Igi sharaǵa Túrkistan oblysy ákiminiń orynbasary Nurbol Turashbekov arnaıy qatysyp, turǵyndardyń qýanyshymen bólisti.
– Bıyl oblys kóleminde áleýmettik jaǵynan osal toptaǵy azamattardyń ómir sapasyn jaqsartý úshin birqatar mańyzdy sharalar atqaryldy. Bul jumystar oblys basshysy Darhan Satybaldynyń tikeleı baqylaýynda tur. Jeke ınvestorlarmen birlesip, turǵyn úı qurylysy júıeli túrde júzege asyrylýda. El ıgiligine usynylǵan ár baspana aýdan turǵyndaryna jaıly ári zamanaýı qolaıly orta syılaıdy, – degen oblys ákiminiń orynbasary turǵyndardyń sapaly ári jaıly ómir súrýi úshin barlyq jaǵdaı jasalǵan jańa baspanalar aımaqtyń áleýmettik ınfraqurylymyn jańǵyrtýǵa qosylǵan úlken úles ekenin de tilge tıek etti.
Jańa baspanalardyń qasbeti birkelki árlenip, aýlalar temir qorshaýmen qorshalǵan. Sý jáne jylý júıeleri tolyq ornatylǵan. Turǵyn úılerde turǵyndardyń jaıly ómir súrýine barlyq jaǵdaı jasalǵan. Ár páterdiń jalpy alańy 71,1 sharshy metrdi quraıdy.
