Túrkistan oblysynda 470-ke jýyq qurylys nysany zań buzǵan
TÚRKІSTAN. KAZINFORM — 2025 jyldyń qorytyndysy boıynsha Túrkistan oblysyndaǵy 469 qurylys nysanynda zań buzý anyqtalyp, qurylys salýshylarǵa 325 mıllıon teńgege jýyq aıyppul salyndy.
Zańsyz salynǵan 40 nysandy májbúrlep buzdyrý jóninde sotqa talap-aryz joldanyp, onyń 5-eýine qatysty buzý týraly sot sheshimi shyqty. Sonymen qatar túsindirý jumystarynyń nátıjesinde 16 nysan qurylys ıeleriniń óz qarajaty esebinen buzyldy. Jalpy oblys boıynsha 1722 nysannyń qurylysy bastalyp, memlekettik baqylaýǵa alyndy.
Atalǵan ahýal Túrkistan oblysynyń ákimi Nuralhan Kósherovke baıandalyp, bıylǵy jylǵa arnalǵan naqty josparlar aıqyndaldy. Óńir damýyna tusaý bolyp otyrǵan zańsyz qurylystarmen kúresti kúsheıtken aımaq basshysy zańsyzdyqqa tosqaýyl qoıýmen qatar, bıýrokratııaǵa jol bermeý jóninde qatań talap qoıdy.
— Zańsyz salynǵan árbir nysan — tek jeke tártip buzýshylyq emes, bul memlekettik josparlaý júıesine, qurylys saıasatyna tikeleı soqqy. Biz bir jaǵynan zańsyz qurylyspen kúresýimiz kerek, ekinshi jaǵynan zańdy jolmen rásimdeletin nysandardyń jolyn jeńildetýimiz qajet. Adamdar aılap, jyldap qujat jınap, tabaldyryq tozdyrmaýy tıis. Bıýrokratııa — zańsyzdyqtyń basty sebepteriniń biri. Zańsyz salynǵan qurylys nysandary talapqa sáıkes retke keltirilýi tıis. Aýdan, qala ákimdikteri salynyp qoıǵan qurylystarǵa ruqsat qujattaryn rásimdep berý praktıkasyn toqtatýdy qatań túrde tapsyramyn. Oǵan ár aýdan, qala basshysy jeke jaýapty, — dedi ol.
Aımaq basshysy shekara aýmaqtarynda, demalys jáne rekreatsııalyq aımaqtarda óz betinshe qurylys salýǵa qatań tyıym salynatynyn da eskertti. Sonymen qatar tek jazalaý sharalarymen shektelmeı, zańsyzdyqqa alyp keletin júıeli kemshilikterdi joıý qajettigin aıtty.
Osyǵan baılanysty qurylys salasyndaǵy tsıfrlandyrýdy kúsheıtý, jergilikti deńgeıde sheshim qabyldaý merzimderin qysqartý boıynsha naqty tapsyrmalar berildi. Zańsyz qurylystarǵa der kezinde shara qoldanbaǵan laýazymdy tulǵalardyń jaýapkershiligi qatań qaralatyny eskertildi.
Oblystyq memlekettik sáýlet-qurylys baqylaýy basqarmasy basshysynyń mindetin atqarýshy Tartý Baıtursynovtyń málimetinshe, 2025 jyly bıýdjet qarajaty esebinen salynyp jatqan 100 qurylys nysanynda zań buzý anyqtalǵan.
— 121 qurylys sýbektisine qatysty ákimshilik sharalar qabyldandy. Nátıjesinde 103 mıllıon teńge aıyppul salynyp, birqatar qurylys kompanııasynyń lıtsenzııalary boıynsha jekelegen jumys túrleri toqtatyldy, — dedi ol.
Budan buryn Túrkistan oblysynda qurylysyna 8,5 mlrd teńge jumsalǵan jańa mektep apatty jaǵdaıda turǵanyn jazǵan edik.