Túrkistan oblysynda 47 kóshege ardagerlerdiń esimi beriledi

TÚRKІSTAN. KAZINFORM — Óńirde Keńes Odaǵynyń batyrlary men Ekinshi dúnıejúzilik soǵysy ardagerleriniń esimderin ulyqtaý jumystary jalǵasyp jatyr. Bıyl jyl sońyna deıin 47 kóshege maıdangerlerdiń aty berilmek. 

Respýblıka boıynsha esimderi ulyqtalýǵa tıis 500 ardagerdiń ishinde 47-si Túrkistan oblysynan usynyldy. Іrikteýdiń basty talaptarynyń biri olar keminde bir ordenmen marapattalǵan bolýy kerek. Osy krıterııge sáıkes oblystan 122 ardagerdiń esimi mınıstrlikke usynylyp, ishinen 47-i maquldandy.

— Qazirgi ýaqytta aýdandyq jáne qalalyq ákimdikter ardagerlerdiń esimderin kóshelerge berý jumysyn júrgizip jatyr. Bul úderis Mádenıet jáne sport mınıstriniń 2023 jylǵy 1 shildedegi № 211 buıryǵyna sáıkes júzege asyrylyp keledi. Atalǵan buıryqta eldi mekenderdiń quramdas bólikterine ataý berý, qaıta ataý nemese transkrıptsııasyn naqtylaý kezinde jergilikti halyqtyń pikirin eskerý tártibi aıqyndalǵan, — delingen Túrkistan oblysynyń mádenıet basqarmasynyń aqparatynda.

Sonymen qatar, 2020 jylǵy 26 mamyrdaǵy № 149 buıryqpen bekitilgen «Memorıaldyq taqtalar ornatýǵa ruqsat berý» memlekettik qyzmet kórsetý qaǵıdalaryna sáıkes, jergilikti ákimdikter tıisti kósheler boıyna ardagerler jaıly aqparat beretin taqtaıshalar men memorıaldyq belgiler ornatý jumystaryn júrgizetin bolady.

Aıta keteıik, budan buryn Qyzylordada 103 jastaǵy soǵys ardageri qurmetke bólengenin jazǵan bolatynbyz.