Túrkistan oblysynda 465 myń gektardan asa jer maqsatyna saı paıdalanylmaǵan
TÚRKІSTAN. KAZINFORM – Túrkistan oblysynda 3 960 jer paıdalanýshynyń 372,6 myń gektar jaıylym jerlerine mal tirkelmegendigi anyqtalǵan.
Túrkistan oblysy jer qatynastary basqarmasynyń basshysy Erǵalı Tilegenniń aıtýynsha, aýdan, qala ákimdikterine 224,1 myń gektar jaıylym jerlerdi memleket menshigine qaıtarý jospary bekitilgen. Qazirgi tańda 219,7 myń gektar jer ýchaskeleri memleket menshigine qaıtarylǵan.
– Aýdan, qala ákimdikteri tarapynan Jer resýrstaryn basqarý departamentine 163,4 myń gektar jer ýchaskelerine qatysty qujattar usynyldy. Zerdeleý jumystarynyń nátıjesinde 2316 jer paıdalanýshynyń 465,2 myń gektar jer ýchaskesin maqsatyna saı paıdalanbaǵany anyqtaldy. Departament tarapynan 403 jer paıdalanýshyǵa 93,3 myń gektar jer ýchaskelerine qatysty nusqama, al aýdan, qala ákimdikteri tarapynan 1177 jer paıdalanýshyǵa 258,3 myń gektar jer ýchaskelerine qatysty habarlama berildi, – dedi ol.
Aıta ketsek, óńirde 2024 jyldyń basynda qoǵamdyq jaıylym jer tapshylyǵy 608 myń gektar bolsa, bıyl 539,8 myń gektardy kórsetip otyr.
Sondaı-aq bıyl oblysta aýyl sharýashylyǵy maqsatyndaǵy 144,9 myń gektar jerdi aınalymǵa qosý josparlanǵan. Búginde 12 konkýrs uıymdastyrylyp, 109,9 myń gektar 478 jer ýchaskesi aınalymǵa engizildi. Onyń ishinde, egistik jer – 4,8 myń gektar, jaıylymdyq jer – 104,5 myń gektar. Al 2026 jylǵa aýyl sharýashylyǵy maqsatyndaǵy 146,5 myń gektar jerdi aınalymǵa engizý josparlanǵan.
Budan buryn Túrkistan oblysynda jerdi zańsyz paıdalanyp, paıdaly qazba óndirgender anyqtalǵanyn jazǵan edik.