Túrkistan oblysynda 45 ret jol erejesin buzǵan júrgizýshi 1,3 mln teńge aıyppulyn tólemegen
TÚRKІSTAN. KAZINFORM — Túrkistan oblysynda júrgizýshige 45 márte jol tártibin buzǵany úshin 1 mln teńgeden astam aıyppul salynǵan. Alaıda ol aıyppuldy osy kezge deıin tólemegen.
Túrkistan oblysynda «Boryshker» jedel-profılaktıkalyq is-sharasy ótip jatyr.
Polıtsııa departamentiniń málimetinshe, reıdtik is-shara barysynda Saıram aýdanynda úsh táýlik ishinde profılaktıkalyq jumystar nátıjesinde 78 boryshker bereshekterin ótegen.
— «Qorǵaý — qaýipti júrgizýshi» baǵdarlamasy arqyly «Changan» markaly avtokólik ıesiniń 1 mln 300 myń teńge kólemindegi bereshegi anyqtaldy. Bul qaryz júrgizýshiniń 45 ret jol qozǵalysy erejesin buzý derekterine qatysty tirkelgen. Kólik aıypturaqqa qoıyldy, — delingen oblystyq polıtsııa departamentiniń habarlamasynda.
Atalǵan jaıt tolyqtaı polıtsııa qyzmetkerleriniń beınejetondaryna tirkelgen.
Budan buryn Túrkistanda betin maskamen japqan eki er adam beınekameralardy qasaqana búldirgenin jazǵan edik.
