Túrkistan oblysynda 4,3 mln tonna mal azyǵy daıyndaldy
Túrkistan oblysynda 4,3 mln tonna mal azyǵy daıyndaldy, dep habarlaıdy Kazinform.
Óńirde jyl saıyn mal basynyń artýyna oraı jem-shópke de suranys kóbeıgen. Sondyqtan búginde egis qurylymyn qalyptastyrýda mal azyqtyq daqyldarǵa basymdyq berilip jatyr. Máselen, bıyl mal azyǵy daqyldary ótken jylmen salystyrǵanda 2,1 myń gektarǵa artyp, 223,7 myń gektarǵa ornalastyryldy. Bul – jalpy egis kóleminiń 26 %-y.
Túrkistan oblysy Aýyl sharýashylyǵy basqarmasy mamandarynyń málimetinshe, ósimdik sharýashylyǵynyń damý qarqyny turaqty saqtalyp otyr. Atap aıtqanda, bıyl óńirde mal qystatý naýqanyna qajetti 4,3 mln tonna iri soıaýly mal azyǵy daıyndalǵan. Sondaı-aq egis alqaptaryndaǵy saban, bıdaı, arpa qaldyqtarynan 89,4 myń tonna pishendeme ázirlengen.
«Bıyl 1,5 jyldyq mal azyqtyq qordy qamtamasyz etý maqsatynda 1,7 mln tonna jońyshqa, 1,9 mln tonna tabıǵı shóp, 22,4 myń tonna súrlem jınaldy. Sonymen qatar taýar óndirýshiler arqyly ózge oblystardan 399,3 myń tonna mal azyǵy satyp alyndy. Qazir naryqta saban baǵasy 650-700 teńge, jońyshqa baǵasy 1250-1300 teńge, pishen baǵasy 900-950 teńgeden saýdalanyp jatyr», - delingen Aýyl sharýashylyǵy basqarmasy tarapynan usynylǵan aqparatta.
Agroqurylymdarǵa da mal azyǵy daqyldaryn egip, mal sharýashylyǵyn damytýǵa úles qosqany úshin memlekettik qoldaý turaqty kórsetiledi. Onyń ishinde, jońyshqa, júgerige naqty satyp alǵan tuqymyna, mıneraldy tyńaıtqyshtaryna jáne zııandy organızmderge qarsy qoldanylatyn pestıtsıdterdiń shyǵyn kólemderiniń 50% sýbsıdııalanady. Al jeńildetilgen janar-jaǵarmaı agroqurylymdardyń suranysyna sáıkes turaqty berilip keledi.
