Túrkistan oblysynda 420-dan astam kásipker tirkeýsiz jumys istegen
TÚRKІSTAN. KAZINFORM — Túrkistan oblysynda kóleńkeli ekonomıkaǵa qarsy kúres aıasynda birqatar zań buzýshylyq anyqtaldy.
Jyl basynan beri óńirde kedendik baqylaý kezinde esirtki zattaryn zańsyz alyp ótýdiń 36 deregi tirkeldi.
Sonymen qatar munaı ónimderin zańsyz áketýdiń 246 faktisi anyqtaldy. Nátıjesinde 9,77 tonna benzın men 25,7 tonna dızel otyny tárkilendi. Sot sheshimimen quqyqbuzýshylarǵa 15,9 mln teńgeden astam aıyppul salyndy. Ótken jyldyń osy kezeńinde 212 derek tirkelip, 19,1 tonna benzın men 28,3 tonna dızel otyny tárkilengen.
— Óńirde júrgizilgen tekserýler barysynda 1059 salyqtyq quqyqbuzýshylyq anyqtaldy. Onyń ishinde 479 jaǵdaıda baqylaý-kassa mashınasy qoldanylmaǵan. Taǵy 421 salyq tóleýshi jeke kásipker retinde tirkelmeı kásipkerlik qyzmetpen aınalysqan. Budan bólek, 23 jaǵdaıda POS-termınal qoldanylmaǵan, al 136 jaǵdaıda alkogol ónimderi lıtsenzııasyz satylǵan, — dedi Túrkistan oblysy boıynsha Memlekettik kirister departamentiniń basqarma basshysy Sáýle Shyrynbekova.
Sondaı-aq 86,3 myń AQSh dollary somasyndaǵy valıýtany zańsyz áketýdiń bes faktisi anyqtaldy.
Buǵan deıin el aýmaǵynan janar-jaǵarmaıdy zańsyz shyǵarýǵa baılanysty qosymsha baktarmen jabdyqtalǵan 537 kólik anyqtalǵanyn habarlaǵan edik.
