Túrkistan oblysynda 400 mln tekshe metrge jýyq sý zańsyz paıdalanylǵan

TÚRKІSTAN. KAZINFORM – Sý resýrstaryn zańsyz paıdalanýǵa qarsy baǵyttalǵan reıdtik sharalar barysynda 20-dan astam azamattyń quqyq buzýshylyq áreketteri anyqtaldy.

Shardara sý qoımasynyń ońtústik bóliginen uzyndyǵy shamamen 3,7 shaqyrym, tereńdigi 1–1,4 metr bolatyn qoldan qazylǵan aryq tabyldy. Sondaı-aq sý qoımasynan arnaıy sorǵysh quraldar arqyly sý alyp otyrǵan 20-dan astam azamattyń áreketteri zańsyz dep tanyldy.

Tekserý kezinde 140 gektardan astam jerdiń ruqsatsyz sýarylǵany belgili boldy. Quqyq buzýshylar Altaı, MTZ traktorlary men KAMAZ, Mercedes kólikteriniń qozǵaltqyshtaryn paıdalanyp, saǵatyna 480 tekshe metrge deıin sýdy zańsyz alyp otyrǵan. Jalpy kólemi 414 mıllıon tekshe metrge jýyq sý ruqsatsyz paıdalanylǵan.

– «Zań men Tártip» qaǵıdaty negizinde polıtsııa departamentiniń uıymdasqan qylmysqa qarsy kúres basqarmasy men jergilikti polıtsııa qyzmeti jáne arnaıy jasaqtan quralǵan mobıldik top qurylǵan bolatyn. Atalǵan top Sý resýrstaryn qorǵaý ınspektsııasymen birlesip jedel-profılaktıkalyq is-sharalar júrgizip jatyr.

Anyqtalǵan derekter boıynsha jınalǵan materıaldar Aral – Syrdarııa basseındik ınspektsııasyna joldanady. Quqyq buzýshylarǵa QR Ákimshilik quqyq buzýshylyq týraly kodeksiniń 141-baby boıynsha zańnamaǵa sáıkes tıisti sharalar qabyldanady, - delingen Túrkistan oblysy polıtsııa departamentiniń baspasóz qyzmeti taratqan aqparatta. 

Aıta keteıik, budan buryn «Qazsýshar» Túrkistan fılıaly eki óndiristik ýchaskesiniń basshylary jumystan ýaqytsha shettetilgenin jazǵan bolatynbyz.