Túrkistan oblysynda 4 jasar «kalkýlıator-bala» turady
TÚRKІSTAN. KAZINFORM — Túrkistan oblysy Qazyǵurt aýdany Altyntóbe aýylynda erekshe qabiletti bala ósip keledi. Nebári 4 jasar Álı Adambek eki tańbaly jáne tipti úsh tańbaly sandardy oısha esepteı alady jáne kóbeıtý amaldaryn aǵylshyn tilinde erkin oryndaıdy.
«Altyntóbe» orta mektebiniń muǵalimi Álııa Mııatbekovanyń aıtýynsha, Álı 5-6 synyp oqýshylary sheshe almaıtyn kúrdeli esepterdi basqalardan buryn shyǵaryp, kópshilikti tańǵaldyryp júr.
Jas výnderkındtiń anasy Nurgúl Myrzaǵalıdyń sózinshe, uly eki jasynan bastap balabaqshaǵa barǵan. Onyń zerektigi sonshalyq, balabaqsha tárbıeshileri «óz qatarlastaryna qaraǵanda ozyq bala» dep mektepke jibergen.
— Úsh jasqa tolar tusta Álı balabaqshaǵa barýǵa asa qulyq tanyta qoımady. Osydan soń mektepke deıingi daıyndyq tobyna berdik. Alǵashynda balanyń beıimdelýine ýaqyt berip, baqylap kórgimiz keldi. Eger qıyndyq týyndasa, qaıtadan balabaqshaǵa berýdi oılaǵanbyz. Biraq ózinen úlken synyp oqýshylarymen birge mektepke baryp júrse de, esh qınalmaı, sabaqqa tez beıimdeldi. Bıylǵy qyrkúıekten bastap daıyndyq sabaǵyna qatysyp keledi, — dedi ol.
Anasynyń aıtýynsha, basqa balalar mýltfılm kórse, Álı aǵylshyn tilindegi matematıkalyq kontentterdi qyzyǵyp tamashalaıdy.
— Uıyqtar aldynda ertegi tyńdaýdyń ornyna, jarty saǵat boıy esep shyǵaryp, kóbeıtý kestesin aıtýdy ótinedi. Sýret salǵandy unatady. Kýbıktermen ǵımarattardy qurastyrǵanǵa áýestigi bar. «Shahmat oınaıyq» dep aǵalaryna jıi aıtady, — dedi ol.
Álı tek matematıkamen shektelmeıdi. Ol álippeni tolyq meńgergen, endi aǵylshyn tilinde jazýdy úırenýge kúsh salyp júr.
— Álı dúnıege kelgennen beri salt-dástúrdi dáripteıtin «Otbasy hrestomatııasy» kitabyn ózimiz de tereńdetip oqyp, ondaǵy tórt qatar óleńderdi jattatyp kelemiz. Aýylda turǵandyqtan, qaladaǵydaı damytý múmkindikteri qarastyrylmaǵan. Degenmen, matematıka pániniń muǵalimi qosymsha sabaqtaryna qatystyryp júr. Al onlaın oqýǵa balanyń jasy áli erte dep esepteımiz. Sondyqtan bul baǵytta ázirge naqty jospar joq, — dedi anasy.
Daryndy balanyń ákesi Sapar — ekonomıst maman, qazirgi ýaqytta jeke kásipkerlikpen aınalysady. Anasy Nurgúl — mektepte aǵylshyn tili pániniń muǵalimi. Otbasy bes ul, bir qyz tárbıelep otyr.
Úlken uldary IT salasy boıynsha bilim alyp júr. Odan keıingi uly týrızm salasynda aǵylshyn tilindegi topta oqıdy. Ol fızıka-matematıka baǵytyndaǵy «Daryn» mektebin támamdaǵan. Qalǵan tórt balasy mektep oqýshylary, túrli pánder boıynsha úzdik nátıje kórsetip keledi.
Budan buryn almatylyq jas ónertapqysh mınıstrlikpen birlesip «aýadan sý alý» jobasyn iske qosatynyn jazǵan edik.