Túrkistan oblysynda 4 myń tonna kókónis saqtaıtyn zamanaýı qoımanyń qurylysy bastaldy
Túrkistan oblysynda 4 myń tonna kókónis saqtaıtyn zamanaýı qoımanyń qurylysy bastaldy, dep habarlaıdy Kazinform.
Túrkistan qalasyna kireberis tustaǵy óndiris aımaǵynda kókónis saqtaıtyn zamanaýı qoımanyń kapsýlasy salyndy. Oǵan QR Premer-mınıstriniń orynbasary Serik Jumanǵarın men Túrkistan oblysynyń ákimi Darhan Satybaldy qatysty.
Jobanyń bastamashysy ári júzege asyrýshy – «Túrkistan» áleýmettik-kásipkerlik korporatsııasy. Jobanyń seriktesi – «M-Adal» JShS. 1 gektar aýmaqta ornalasqan qoımanyń kólemi – 3264 sharshy metr.
Qurylysy qolǵa alynǵan qoıma 2024 jyldyń alǵashqy jartyjyldyǵynda el ıgiligine tapsyrylady. Saýran aýdany aýmaǵyndaǵy bul qoımada jylyna 4 myń tonna kókónis saqtalady. 35 adam jumyspen qamtylady.
Qoımada iri 9 kamera bar. Onyń 4 kamerasynyń árbirine 500 tonnadan jalpy 2 myń tonna kartop saqtalsa, eki kamerasyna 500 tonnadan, jalpy 1000 tonna pııaz saqtalmaq. Sonymen birge 250 tonna sábiz, qyryqqabat saqtaıtyn kameralary da iske qosylady dep josparlanǵan. Al 500 tonna kókónis qurǵaq qoımada ornalastyrylady.
Atalǵan aýmaqta Serik Jumanǵarınge oblysta óndiris salasynda júzege asyrylyp jatqan jobalar tanystyryldy. Bıyl óńirde ónerkásip ónim kólemi 681 mlrd teńge boldy (4,7 paıyzǵa artty). Óńdeý ónerkásibinde bıyl jalpy quny 30 mlrd teńge bolatyn 20 jobany iske asyryp, 594 jumys ornyn ashý josparlanǵan. Jyl basynan 12 joba iske qosylyp, jańa jumys oryndary ashyldy.
