Túrkistan oblysynda 4 000-nan astam adam «Kúmis jas» jobasymen jumysqa ornalasty

TÚRKІSTAN. KAZINFORM - Qazirgi kúni aǵa býyn ókilderin qolynan keletin jumyspen qamtamasyz etýge elimizde mol múmkinder qarastyrylyp otyr. Aıtalyq, «Eńbek naryǵyn damytýdyń 2024-2029 jyldarǵa arnalǵan tujyrymdamasy» negizinde zeınetkerlik jasyna jaqyndaǵan jumyssyz azamattardy jumyspen qamtý maqsatynda «Kúmis jas» jobasy júzege asyrylyp keledi. 

«Kúmis jas» jobasy negizinen zeınetke shyǵýǵa jasy taıap qalǵan adamdar úshin óte tıimdi. Máselen, Tólebı aýdanynyń turǵyny Medetbekova Qalıma Qapashqyzy «Kúmis jas» jobasy aıasynda «Alan-A» jeke kásipkerligine 2024 jyldyń aqpan aıynda jumysqa joldanǵan bolatyn. Qazirgi tańda ózine júktelgen jumysty abyroımen atqaryp keledi.

Al, Kalııa Jýsanbaeva atalǵan jobamen «Qalampyr ana» balabaqshasynda jumys istep júr.

«Ótken jyly jumys izdep Tólebı aýdandyq mansap ortalyǵynyń qyzmetkerlerine júgindim. Alǵashynda jumyssyz adam retinde tirkeldim, sodan keıin ortalyq mamandary maǵan sáıkes jumys oryndaryn usyndy. Usynylǵan jumys oryndarynyń arasynan «Qalampyr ana» balabaqshasyna «Kúmis jas» jobasymen jumysqa ornalastym», - deıdi Kalııa Kemerqyzy. 

Arys qalasynyń turǵyny Aınash Kúzenbaeva 2024 jyldyń qańtar aıynda Arys qalalyq mansap ortalyǵyna júgingen bolatyn. Memlekettik qoldaý sharalary týraly tolyq aqparat alǵannan keıin «Kúmis jas» jobasy baǵytyn tańdap, «Almagúl sheber» jeke kásipkerligine jumysqa ornalasyp, qazirgi ýaqytta sol jerde tabysty eńbek etýde.

«Men Arys qalalyq mansap ortalyǵyna qańtar aıynda júgindim, al 1 aqpan kúni meni jumysqa ornalastyrdy. Jasymdy eskere otyryp, olar maǵan osyndaı qysqa merzimde laıyqty jumys tabady dep oılamadym. Bul - bizdiń jastaǵy azamattarǵa arnalǵan keremet múmkindik. Qurdastaryma, zamandastaryma osy jobaǵa qatysýǵa keńes beremin, - deıdi Aınash Ýrazalyqyzy.

Bıyl Báıdibek aýdany boıynsha «Kúmis jas» jobasymen 80 azamattyń jumysyn uıymdastyrý josparlanyp, tolyǵymen 80 azamat turaqty jumysqa joldanǵan. «Jyldyq jospar 100 paıyzǵa oryndaldy» - deıdi sala mamandary. Osy oraıda jasy elýden asqan adamdardyń tıimdi jumyspen qamtylýyna aıryqsha nazar aýdarylyp otyr. Solardyń biri – Lázzat Iskakova. Ol Báıdibek aýdandyq Mansap ortalyǵyna jumyssyz azamat retinde júginip, joba aıasynda jeke kásipker «Beket» jylyjaıyna jumysqa ornalasty. Qazirgi tańda Lázzat hanym jumysqa belsene kirisip, tapsyrylǵan isti abyroımen atqaryp keledi.

Jetisaı aýdanynda kásipkerlikti damytýdyń 2021-2025 jyldarǵa arnalǵan ulttyq jobasy sheńberinde zeınetkerlik jasyna jaqyndaǵan jumyssyz azamattardy jumyspen qamtý sharalary joǵary deńgeıde júrgizilip jatyr. Ásirese, bul joba zeınetke shyǵýǵa jasy taıap qalǵan adamdar úshin óte tıimdi bolýda.

Aıtalyq, Ómirbek Algıbaev - shashtaraz, Orazkúl Bektenova - satýshy, al Aısulý Býharova aspaz bolyp «Kúmis jas» jobasy negizinde aýdan ortalyǵynda ornalasqan «Darıha» jeke kásipkerliginde jumysqa joldanǵan bolatyn. Qazirgi tańda olar ózderine tıisti jumystaryn abyroımen atqaryp keledi.

Ordabasy aýdany, Temirlan aýylynyń turǵyny Tájikúl Meńbaeva da «Kúmis jas» jobasy negizinde aýdan ortalyǵynda ornalasqan «Shyraılym» jekemenshik bóbekjaı-balabaqshasynda jumys istep keledi. Al, Tólebı aýdanyndaǵy Hanaryq aýylynyń turǵyny Gaırat Gýlbaev memlekettiń qoldaýynyń aıasynda «Sarvar» jeke kásipkerligine qurylys kóligin júrgizýshi bolyp eńbek etýde. 

«53 jastamyn. Negizi eńbek ótilim bar. Biraq keı sebeptermen jumyssyz qalyp qoıdym. «Kúmis jas» baǵdarlamasy bar ekenin estigen soń qatysyp kórgim keldi. Mamandardyń nusqaýymen aqpan aıynda jumysqa qabyldandym. Jumys yńǵaıly, ózime unaıdy. Eńbektenbeı, ózgelerden kómek kútetin adamdarǵa aıtarym memleket halyq úshin baǵdarlamalardy shyǵaryp jatqan kezde múmkindikterdi paıdalanýymyz kerek. «Kúmis jas» jobasy atyna saı atqarylyp jatyr eken. Men óz qurdastaryma qatysyńdar dep keńes beretin boldym», - deıdi Gaırat Gýlbaev.

Al, Kentaýda «Kúmis jas» jobasymen kásibı sertıfıkattalǵan massaj mamany jumys isteıdi. «Mom-baby» massaj ortalyǵyna jumysqa joldanǵan Janbıbi Djanıbekova dısplazııa, DTsP, bulshyq et tonýsynyń buzylýy, omyrtqanyń qısaıýy, JRVI asqynýlar, psıhomotorly damýdyń tejelýi syndy densaýlyǵynda aqaýy bar búldirshinderge massaj jasap, emdeıdi. Búginge deıin balabaqshada jumys istegen Janbıbi búldirshindermen qalaı til tabysý kerektigin biletin, olardy erkelete bilýde aldyna jan salmaıtyn meıirimdi jan. «Kúmis jas» jobasymen jumys istep júrgen ol profılaktıkalyq jáne emdik massaj túrlerin jasaıtyn kásibı sertıfıkattalǵan maman.

Túlkibas aýdanynda «Kúmis jas» jobasy boıynsha 130 azamat jumysqa joldanǵan. Jyldyq jospar 100 paıyzdy qurap otyr. Atalǵan joba boıynsha jumys tapqan jannyń biri Jabaǵyly aýyldyq okrýginiń turǵyny - Lazzat Darmenova. Ol «NýrDı» jeke kásipkerligine kúmis jas baǵdarlamasymen aspazshy qyzmetine joldanǵan. Qazirgi tańda tıisti jumystaryn abyroımen atqaryp keledi.

Jalpy, «Kúmis jas» jobasyna 50 jastan asqan jumyssyz azamattar 36 aıǵa deıin qatysa alady. Jobaǵa qatysý úshin Mansap ortalyǵyna ótinish berý kerek. «Kúmis jas» jobasyn qarjylandyrý Eńbek mobıldiligi ortalyǵy jumys berýshiniń joba sheńberinde jumysqa ornalastyrylǵan jumyssyzdarǵa eńbekaqy tóleýge jumsaǵan shyǵyndarynyń bir bóligin óteýge sýbsıdııalar berý jolymen júzege asady. 

«Kúmis jas» jobasyna qatysý merzimi aıaqtalǵannan keıin jumys berýshi zeınetkerlik jasqa tolmaǵan adamdy keminde 1 jyl turaqty jumyspen qamtýǵa mindetti. 

Jasyratyny joq, elimizde jastarǵa qaraǵanda egde jastaǵy adamdardyń jumys tabýy qıyn. Zeınetaldy jastaǵy adamdar jumys istep, jınaqtaýshy zeınetaqy qoryna jarnasyn aýdaryp otyrmasa, kúni erteń onyń zeınetaqysy mardymsyz bolyp qalady. Al, memleket qolǵa alyp otyrǵan «Kúmis jas» jobasy osyndaı olqylyqtar bolmaýy úshin jasalyp jatqan jaǵdaı.

Jobaǵa qatysýshylardyń jalaqysynyń jartysyn memleket, jartysyn jumys berýshi tóleıdi. Mysaly, jumys berýshi 180 myń teńge jalaqy belgilese, onda onyń 90 myńyn memleket tóleıdi. 

Túrkistan oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetine súıensek, bıylǵy jyldyń 8 aıynda óńirde naqty 78,8 myń adam jumyspen qamtý sharalaryna joldanyp, jospar 66,3 paıyzǵa oryndalǵan. Onyń ishinde 38,8 myń adam turaqty, 39,9 myń adam ýaqytsha jumyspen qamtylyp otyr. 

Sýbsıdııalanǵan jumys oryndaryna naqty 38 657 adam (4 456 adam áleýmettik jumys oryndaryna (95,2%); 11 557 adam jastar praktıkasyna (73,1%); 14 965 adam qoǵamdyq jumys oryndaryna (107,3%); 3 432 adam «Alǵashqy jumys orny» jobasyna (95,6%); 4 247 adam «Kúmis jas» jobasyna (104,9%) joldandy.