Túrkistan oblysynda 3,7 mlrd teńgeni jymqyrǵan bilim salasynyń qyzmetkerleri sottaldy

TÚRKІSTAN. KAZINFORM — Shardara aýdandyq bilim bóliminde memleket qarjysyn jymqyrý deregine baılanysty qylmystyq is qaralyp, sot úkimi shyqty. 

Bul is boıynsha barlyǵy 14 aıyptalýshyǵa qatysty sot úkimi shyqty. Onyń ishinde bilim bólimi qyzmetkerleriniń toǵyzy 7 jylǵa bas bostandyǵynan aıyryldy.

Kishkentaı balasy bar eki sottalýshyǵa jazasyn 5 jyldan keıin óteý quqyǵy berildi. Sondaı-aq eki aıyptalýshy 2 jylǵa bas bostandyǵynan shektelse, bireýi raqymshylyqqa iligip, jazadan bosatyldy. Іs anyqtalyp jatqan kezeńde bir sottalýshynyń qaıtys bolǵany belgili boldy.

Tergeý dereginshe, memleketke keltirilgen jalpy shyǵyn kólemi 3,7 mlrd teńge. Qazirgi tańda onyń 70 mln teńgesi ǵana óndirilip qaıtarylǵan. Sondaı-aq, sot sheshimimen sottalýshylardyń qymbat kólikteri, páterleri jáne ózge de jyljymaıtyn múlikteri memleket menshigine tárkilendi.

Atalǵan úkim zańdy kúshine engen joq.

Aıta keteıik, budan buryn Shymkentte psıhotroptyq zat daıyndaýǵa áreket jasaǵan adam 8 jylǵa sottalǵanyn jazǵan bolatynbyz.