Túrkistan oblysynda 37 myńnan astam turǵyn qant dıabetimen aýyrady

TÚRKІSTAN. KAZINFORM – Óńirde qant dıabetimen naýqastanýshylar kóbeıgen. Bul týraly Túrkistan oblysy boıynsha shtattan tys bas endokrınolog dáriger Ǵalııa Batyrhanova málimdedi.

Túrkistan oblystyq klınıkalyq aýrýhanasynyń endokrınologııalyq ortalyǵy búgin ashyq esik kúnin ótkizedi. Іs-sharaǵa kelgen barlyq azamat qandaǵy qant deńgeıin anyqtaı otyryp, arnaıy mamannan keńes ala alady. 

«14 qarasha – Dúnıejúzilik qant dıabetimen kúres kúni. Qant dıabeti – bul qanda qant mólsheriniń kóbeıip ketýinen paıda bolatyn dert. Statıstıkalyq málimetterge súıensek, qazirgi tańda elimizde qant dıabetine shaldyqqan 500 myńǵa jýyq azamat tirkelgen. Jyl saıyn 30 myń adam qant dıabetine shaldyǵady. Al, Túrkistan oblysynda qant dıabetimen naýqastanatyn 37 myńnan astam turǵyn bar. Óńirde jyl saıyn 3,5 myńǵa jýyq adamǵa atalǵan dıognoz qoıylyp keledi. Qant dıabetin erte anyqtaý – onyń asqynýlarynyń aldyn alýǵa múmkindik beredi», - dedi Ǵalııa Batyrhanova.

Al, balalar dárigeri-endokrınolog Araı Jaılaýbaeva oblystaǵy qant dıabetine qarsy kúres jumystarynyń barysy týraly baıandady. 

«Resmı statıstıkalyq málimetterge súıensek, Túrkistan oblysynda 431 bala ınsýlınge táýeldi bolyp tirkeýge alynǵan. Al, jyl basynan bergi 9 aı ishinde 38 baladan qant dıabeti anyqtaldy», - dedi Araı Jaılaýbaeva.