Túrkistan oblysynda 358 jumyskerdiń eńbek quqyǵy qorǵaldy
TÚRKІSTAN. KAZINFORM – Bıylǵy jyldyń 9 aıynda óńirde 29 óndiristik jazataıym oqıǵa tirkeldi. Saldarynan 37 adam zardap shekse, 6 adam qaıtys boldy. Bul týraly memlekettik eńbek ınspektsııasy komıtetiniń Túrkistan oblysy boıynsha departamenti RMM basshysynyń mindetin atqarýshy Berik Ibadýllaev málimdedi.
Bıylǵy jyldyń 9 aıynda 1039 azamattyń aryz-shaǵymdaryn qaraǵan sala mamandary olardyń barlyǵyna zańmen belgilengen merzimde jaýap bergen. Atalǵan aryzdar boıynsha mekemeler men kásiporyndarda barlyǵy 151 tekserý júrgizip, nátıjesinde 262 zań buzýshylyqty anyqtady. Sonyń negizinde 122 nusqama berilip, eńbek zańnamasynyń buzylýy boıynsha 798 hattama toltyryldy. Sondaı-aq, eńbek zańnamasyn saqtamaǵan mekemelerge 25,5 mln teńge kóleminde aıyppul saldy.
«Bıylǵy jyldyń 9 aıynda oblys boıynsha 5 kásiporynda 402 jumysker aldynda 204,1 mln teńge jalaqy qaryzynyń oryn alǵany anyqtaldy. Jumys berýshilerge oryndalýy mindetti nusqamalar berý arqyly 102,9 mln teńgesi óndirilip, 358 jumyskerdiń eńbek quqyqtary qorǵaldy. Búgingi tańda, «Qyran» fýtbol klýbynyń 44 jumyskeri aldynda 101,2 mln teńge jalaqy qaryzy boıynsha qujattar sot oryndaýshylarǵa joldandy. Qazir óndirý jumystary jalǵasýda» - dedi Berik Ibadýllaev.
Jalpy jyl basynan beri óńirde 29 óndiristik jazataıym oqıǵa boldy. Saldarynan 37 adam zardap shekse, 6 adam qaıtys boldy. Atalǵan óndiristik jaraqattar boıynsha jumys berýshilerge qylmystyq is qozǵaý úshin 25 is-qujat quqyq qorǵaý organdaryna joldandy.
«Óndiristik jaraqattaný deńgeıin tómendetý jáne aldyn alý sharalaryn qabyldaý maqsatynda óńirdegi kásiporyndarda «Halyqtyq baqylaý» jobasy men «Nóldik jaraqattaný – Vizion Zero» tujyrymdamasyna qosylý, sondaı-aq, eńbekti qorǵaýdyń zamanaýı standarttaryn qabyldaý boıynsha aqparattyq túsindirý jumystary júrgizildi. Nátıjesinde, 6 kásiporyn «Halyqtyq baqylaý» jobasyn júzege asyryp, 18 kásiporyn «Nóldik jaraqattaný – Vizion Zero» tujyrymdamasyna qosyldy» - dedi Berik Ibadýllaev.
Memlekettik eńbek ınspektorlary eńbek zańnamasy jáne eńbekti qorǵaý talaptarynyń saqtalýy boıynsha oblystaǵy óndiris jáne qurylys nysandaryndaǵy merdiger mekemelerge turaqty túrde túsindirý jumystaryn júrgizip keledi jáne kezdesýler men semınar-keńester ótkizilýde.
Bir qýanarlyǵy, jyl basynan beri oblys kóleminde eńbek janjaly bolmaǵan. Áleýmettik shıelenistiń týyndaý táýekeli bar 157 kásiporyn anyqtalyp, olarmen algorıtmge sáıkes jumys júrgizilgen. Eńbek táýekelderiniń kartasyna sáıkes óńirdiń 23 kásiporny eńbek janjaldarynyń aldyn alý jáne áleýmettik shıelenistiń týyndaýy boıynsha turaqty monıtorıngke alynǵan. Bul rette, 8 kásiporyn óńirdiń eńbek qatynastary men qaýipsizdik modeli boıynsha táýekeldiń joǵary deńgeıine jatady.
«Búgingi tańda joǵaryda atalǵan kásiporyn qyzmetkerlerinen ótinishter, onyń ishinde beıneótinishter túsken joq. Qazirgi ýaqytta joǵaryda atalǵan barlyq kásiporyndar shtattyq rejımde jumys isteıdi, olar boıynsha oblystyń memlekettik eńbek ınspektorlary turaqty monıtorıng júrgizýde» - dedi Berik Ibadýllaev.
