Túrkistan oblysynda 34 dáriger Túrkııa men Reseıde biliktiligin arttyryp keldi
TÚRKІSTAN. KAZINFORM - Túrkistan oblysynda 49 medıtsınalyq sanıtarlyq alǵashqy kómek nysandarynyń qurylysy josparlanǵan. Onyń ishinde 20 dárigerlik ambýlatorııa, 23 feldsherlik-akýsherlik jáne 6 medıtsınalyq pýnkt qamtylǵan.
Búgin oblys ákimi Darhan Satybaldynyń tóraǵalyǵymen ótken májiliste «Aýylda densaýlyq saqtaýdy jańǵyrtý» Ulttyq pılottyq joba aıasynda bastalǵan densaýlyq nysandarynyń búgingi jaı-kúni talqylandy. Óńir basshysy jaýaptylarǵa qurylys barysyn qatań qadaǵalaýdy tapsyryp, birqatar mindetter júktedi.
«Densaýlyq nysandarynda josparlanǵan kúrdeli jóndeý jumystaryn aralap kórýdi tapsyramyn. Týyndaǵan máselelerdi der kezinde sheship, qujat jaǵyn erterek aıaqtańyzdar. Ózderińiz bilesizder, oblysymyz turǵyn sany kóp óńirler qatarynda. Sondyqtan halyqtyń densaýlyǵyn jaqsartý barysynda olarǵa sapaly medıtsınalyq qyzmetter kórsetetin zamanaýı densaýlyq mekemeleri asa qajet», - dedi oblys ákimi.
Qazirgi tańda 30 nysannyń qurylys jumystary júrgizilýde. 18 jobanyń merdiger mekemeleri anyqtalyp, qurylys jumystaryn 19 tamyzda bastalady dep josparlanýda. Bul týraly Oblystyq densaýlyq saqtaý basqarmasynyń basshysy Ashan Baıdývalıev baıandady. Respýblıkalyq bıýdjetten 45 nysanǵa qarjy qaralǵan. 1 jobany jeke menshik medıtsınalyq uıym óz qarajaty esebinen qurylysyn júrgizip jatyr.
Jalpy 42 nysandy ınjenerlik jelilermen qamtýǵa jergilikti bıýdjetten qarjy qaraldy. Onyń 20-synda qurylys-montajdaý jumystary júrgizilýde. 2 nysan boıynsha konkýrs ótkizililse, qalǵan 20 nysan qurylysyn bastaýǵa daıyndyq jumystary júrip jatyr.
Bıyl 7 densaýlyq saqtaý nysandaryna kúrdeli jóndeý jumystaryn bastaý josparlanǵan. Qazirgi tańda Jetisaı, Sozaq jáne Saıram aýdanyndaǵy Úsh nysannyń JSQ-lary memlekettik saraptamadan ótkizilýde. Bireýi memlekettik saraptamanyń oń qorytyndysyn alyp, memlekettik satyp alý portalyna konkýrsy jarııalandy.Al Kentaý qalasy men Keles, Báıdibek aýdandarynda qujat jaǵy rettelýde.
Túrkistan oblysynyń densaýlyq saqtaý qurylymynda 45 memlekettik mekeme, 756 uıym jáne 130 jeke menshik mekeme bar. Onyń ishinde 36-sy emhana. Oblys boıynsha 351 akýsher-gınekolog, 252 anestezıolog-reanımatolog, 95 neonatolog, 253 pedıatr, 6 balalar kardıohırýrgy kómek kórsetýde.
Byltyr 43, bıyl 34 dáriger Túrkııa, Reseı elderinde biliktiligin arttyryp keldi. Kadrlar daıarlaý boıynsha oblys ákiminiń qoldaýymen ótken jyly beıindi mamandar daıarlaý úshin rezıdentýraǵa 60 grant bólinip, qazirgi tańda 37 úmitker medıtsına salasy boıynsha bilimin jetildirýde. Orta medıtsınalyq qyzmetkerlerdi daıarlaý úshin 650 grant bólingen bolatyn. Bıyl rezıdentýraǵa grant 139 grant, orta medıtsınalyq qyzmetkerlerdi daıarlaý úshin 600 grant bólinip, qazirgi tańda qabyldaý komıssııalary jumys jasap jatyr.
