Túrkistan oblysynda 32 eldimeken mobıldi ınternetpen qamtylmaǵan
TÚRKІSTAN. KAZINFORM — Túrkistan oblysynda 801 eldimekenniń 32-si mobıldi ınternetpen qamtylmaǵan. Bul aýmaqta 4,5 myńnan astam adam turady.
Oblystyq tsıfrlandyrý, memlekettik qyzmetter kórsetý jáne arhıvter basqarmasy basshysynyń orynbasary Baıdáýlet Abaıdyń aıtýynsha, búginde óńirdegi 612 eldimeken 4G, al 157 eldimeken 3G tehnologııasy arqyly mobıldi ınternetke qosylǵan.
— Mobıldi ınternetpen qamtylmaǵan 32 eldimekenniń jeteýi 2030 jylǵa deıin mobıldi ınternet jelisimen qamtý boıynsha uıaly baılanys operatorlarynyń lıtsenzııalyq mindettemelerine engizildi. Al halyq sany 250 adamǵa jetpeıtin ári jer bederi kúrdeli 25 eldimekende baılanys ınfraqurylymyn damytý boıynsha qosymsha jumystar júrgizilip jatyr, — dedi ol.
Spıkerdiń aıtýynsha, bıyl Túrkistan jáne Kentaý qalalarynda, sondaı-aq 14 aýdandaǵy 196 núktede «Ksell» AQ-nyń 5G bazalyq stantsııalary ornatylǵan. Budan bólek Arys pen Kentaý qalalarynda 5G jelisin iske qosyp, qamtý aýmaǵyn keńeıtý josparlanyp otyr.
2025-2026 jyldary júrgizilgen tekserýler barysynda oblystyń 95 núktesinde mobıldi baılanys sıgnalynyń álsizdigi nemese múlde bolmaýy anyqtalǵan.
— Onyń ishinde «Mobaıl Telekom-Servıs» JShS jelisine qatysty — 27, «KaR-Tel» JShS — 32, «Ksell» AQ — 36 núkte tirkeldi. Qazir uıaly baılanys operatorlarymen birlesip, 95 núkteniń 72-sindegi «aq daq» joıyldy. Qalǵan 23 aýmaqty sapaly baılanyspen qamtý jumystary jyl sońyna deıin aıaqtalady dep josparlanyp otyr, — dedi basqarma ókili.
Sonymen qatar birqatar eldimekende turǵyndardyń qoldanystaǵy bazalyq stantsııalardy alyp tastaýdy talap etýi mobıldi ınternet sapasyna keri áserin tıgizip otyr.
— Mundaı jaǵdaılar Túrkistan qalasynda — 5, Kentaý qalasy men Saıram, Tólebı aýdandarynda — 3-ten, Jetisaıda — 2 jáne Saryaǵash aýdanynda 1 núktede tirkeldi. Bul ınternet sapasynyń tómendeýine jáne jańa «aq daqtardyń» paıda bolýyna sebep bolyp otyr. Sondyqtan aýdan jáne qala ákimdikteri turǵyndar arasynda túsindirý jumystaryn kúsheıtýi qajet, — dedi spıker.
Sonymen qatar «Qoljetimdi ınternet» ulttyq jobasy aıasynda oblysta 372 eldimekenge 2 638 shaqyrym talshyqty-optıkalyq baılanys jelisin tartý jumystary júrgizilip jatyr. Qazirgi ýaqytta 58 aýylǵa 463,3 shaqyrym jeli tartylǵan.
Buǵan deıin Qazaqstanda mobıldi ınternetti paıdalanýshylar sany 18,5 mıllıonǵa jetkeni týraly jazǵan edik.
