Túrkistan oblysynda 310 oryndyq mektepte 1 myń bala oqyp júr
TÚRKІSTAN. KAZINFORM — Óńirde úsh aýysymmen jumys isteıtin tórt mektep bar.
Memlekettik qoldaýdyń aıasynda óńirlerdegi úsh aýysymdy mektep máselesi búginde óz sheshimin taba bastady. Bul baǵytta «Jaıly mektep» ulttyq pılottyq jobasynyń úlesi kóp.
Sondaı-aq, kásipkerler tarapynan jekemenshik mektep salý isi de óńirlerdegi mektep tapshylyǵyn joıýǵa atsalysyp keledi.
Búginde demografııalyq ósim joǵary Túrkistan oblysynda úsh aýysymda jumys isteıtin tórt mektep bar. Másele bıyl sheshimin tabady dep josparlanyp otyr.
310 oryndyq mektepte 1000-ǵa jýyq bala oqyp júr
Saıram aýdany Jibek joly aýylynda ornalasqan Bókeıhan jalpy orta mektebi 1971 jyly salynǵan. Búginde 310 oryndyq bilim ordasynda 1000-ǵa jýyq bala bilim alady.
Jalpy oqýshy sany 3 ese kóp. Óńirde jekemenshik mektepter ashylǵan sátte bala sany kúrt azaıǵan. Degenmen keıin ketken oqýshylar synybyna qaıta oralypty.
Dál qazir mektepte 972 bala bar. Mektep basshylyǵynyń aıtýynsha, keı jyldary bala sany 1200-ge deıin artqan kezder bolǵan.
Alǵashqy aýysymnyń sabaǵy taǵy saǵat 08:00–de bastalady. Al, saǵat 11:30–13:00 aralyǵynda mektepaldy daıarlyq toby men birinshi synyptar oqıdy.
Saǵat 14:00–de joǵary synypqa sabaq bastalady. Bir synypta 28-29 oqýshy bar. Aýylda demografııalyq ósim óte joǵary. Jyl saıyn mektepaldy daıarlyq synybyna 120-130 shamasynda bala keledi.
Mektep basshylyǵy máseleni sheshý úshin joǵaryda turǵan jaýapty sala basshylaryna hat jazyp, máseleni jetkizgen.
Al, mekteptiń bilim sapasy joǵary. Ótken jyly túlekter UBT-dan joǵary upaı jınap, mektep oblystyq deńgeıde alǵashqy orynnan kóringen.
Odan bólek, oqýshylar respýblıkalyq, oblystyq baıqaýlar men bilim básekelerinde top jaryp júr.
Óńirge taǵy 42 mektep kerek
Túrkistan oblysynyń bilim basqarmasy usynǵan málimetke súıensek, óńirde 4 úsh aýysymdy mektep bar. Túrkistan qalasynda ornalasqan 1 mekteptiń máselesi «Jaıly mektep» ulttyq pılottyq jobasy sheńberinde sheshilgen.
Al, 3 mektepke qajetti jańa ǵımarattardyń qurylysy bastalǵan. 2025 jyly nysandar tolyq paıdalanýǵa beriledi dep kútilýde.
- Sozaq aýdany Sholaqqorǵan aýylyndaǵy 900 oryndyq № 14 T.Álimqulov atyndaǵy mektep-lıtseı ınternaty.
- Qazyǵurt aýdany Sharbulaq aýylyndaǵy 300 oryndyq «Sharbulaq» jalpy bilim beretin mektebi.
- Saıram aýdany Jibek joly aýylynda ornalasqan 310 oryndyq Bókeıhan jalpy orta mektebi.
— Túrkistan oblysy boıynsha 2022 jyly 15 mektep, 2023 jyly 7 mektep qurylysy aıaqtalyp paıdalanýǵa berilgen. 2024 jyly bıýdjet esebinen 50 mekteptiń qurylysy bastaldy. Onyń ishinde «Jaıly mektep» ulttyq jobasymen — 29 mektep, «Bilim berý ınfraqurylymyn damytý qory» jáne ózge de bıýdjetter esebinen — 21 mektep bar. «Jaıly mektep» ulttyq jobasymen 13 mekteptiń qurylysy aıaqtalǵan. Qazir onyń 8-i paıdalanýǵa berildi. Sondaı-aq, ózge de bıýdjetter esebinen taǵy 13 mektep paıdalanýǵa berilip otyr. 8 mekteptiń qurylysy 2025 jylǵa ótpeli, — delingen Túrkistan oblysy bilim basqarmasy basshysynyń basshynyń mindetin atqarýshy Jandos Mahanbetov usynǵan aqparatta.
Sondaı-aq ol oblysta jalpy qýaty 24 900 oryndyq 42 mektep qurylysyna degen qajettilik bar ekenin jetkizdi.
Onyń ishinde 8-i — qosymsha qurylys bolsa, 34-i — jańa qurylys.
— Jalpy qýaty 5 800 oqýshy oryndyq 27 mekteptiń qurylysyn bıýdjet esebinen salý usynylyp otyr. 27 mekteptiń altaýynda jobalyq-smetalyq qujattama daıyn, 10 mekteptiń qujatyn qaıta túzetý qajet bolsa, 11-ine ázirleý qajet, — deıdi bilim basqarmasynan.
Aıta keteıik, Túrkistan oblysynda jalpy 1084 orta bilim mekemesinde 554 654 oqýshy (memlekettik 915 mektepte — 502 289 oqýshy, jekemenshik 169 mektepte — 52 365 oqýshy) bilim alyp júr.
Eske sala keteıik, budan buryn BQO-da úsh aýysymdy mektepter máselesi qalaı sheshilip jatqanyn jazǵan bolatynbyz.