Túrkistan oblysynda 300 mektep «Starlink» ınternet jelisine qosylady

TÚRKІSTAN. KAZINFORM – Óńirde tómen jyldamdyqty ınternetpen qamtylǵan 390 orta bilim berý uıymy bar.

Sala mamandarynyń aıtýynsha bilim ordalaryn «Starlink» joǵary jyldamdyqty spýtnıkti ınternet jelisine qosý jobasy bıylǵy jyl ishinde júzege aspaq. Sonda óńirdegi 330 mekteptegi ınternet máselesi óz sheshimin tabady. Al, qalǵan 60 mektep «Qazaqtelekom» AQ tarapynan «Qoljetimdi ınternet» ulttyq jobasy aıasynda talshyqty-optıkalyq baılanys jelisimen qamtylady.

«Túrkistan oblysy boıynsha 909 memlekettik mektep bar. Onyń ishinde 530 mektep talshyqty-optıkalyq baılanys jelisi arqyly jyldamdyǵy 20 Mbıt/s-tan joǵary ınternet jelisimen qamtylǵan. Al, 264 mektep shekara mańynda jáne taýly aýmaqtarda ornalasýyna baılanysty radıokópir tehnologııasy arqyly ınternet jelisine qosylǵan. 115 mektep tehnıkalyq múmkindigine baılanysty jyldamdyǵy 512 kb/s - 8 Mbıt/s quraıtyn sapasy tómen ınternet jelisimen jumys istep keledi. Jalpy, ótken jyly tómen jyldamdyqty ınternetpen qamtylǵan 390 orta bilim berý uıymdarynyń tizimi jasaldy» - delingen Túrkistan oblysy bilim basqarmasy usynǵan aqparatta.

Aıte keteıik, budan aldyn Qazyǵurt aýdanyna qarasty Aqqum aýylynyń muǵalimderi kúndelik toltyrý úshin jol boıynda ınternet qýalap júretini jaıynda jazǵan bolatynbyz. Noýtbýkterin kóterip alǵan muǵalimder ınternet paıdalaný úshin aýyldaǵy qyr basyna shyǵýǵa májbúr bolǵan.

Túrkistan oblysy bilim basqarmasy bul máselede sheshimin tapqanyn jetkizdi.

«Mektepke «Transtelekom» ótken jyly radıomost arqyly jyldamdyǵy 20 Mbıt/s bolatyn ınternet qosty. Qazirgi tańda 12-20 Mbıt/s aralyǵynda jumys istep tur. Sondaı-aq, aýylǵa Kcell kompanııasy 4G jyldamdyqtaǵy aktıv baılanysyn ornatty» - delingen vedomstva usynǵan aqparatta.