Túrkistan oblysynda 300-den astam kópir tehnıkalyq tekserýdi qajet etedi
TÚRKІSTAN. KAZINFORM – Túrkistan oblysynda 300-den astam kópirge tehnıkalyq tekserý júrgizý qajettiligi anyqtaldy. Óńirde barlyǵy 868 kópir bar. Qazir olardyń birqataryn jóndeý jáne rekonstrýktsııalaý jumystary júrgizilip jatyr.
Oblystyq Jolaýshylar kóligi jáne avtomobıl joldary basqarmasynyń basshysy Qýat Jumataevtyń aıtýynsha, óńirdegi kópirlerdiń 107-si respýblıkalyq, 404-i oblystyq, 357-si aýdandyq mańyzy bar avtomobıl joldarynda ornalasqan.
– Bıyl oblys aýmaǵynda 10 kópirdi jóndeý jáne rekonstrýktsııalaý jumystary júrgizilip jatyr. Bul maqsatqa bıýdjetten 1,8 mlrd teńge qarastyrylǵan. Jyl sońyna deıin alty kópirdi paıdalanýǵa berý josparlanyp otyr, – dedi Qýat Jumataev.
Qazirgi ýaqytta «Ońtústik joldary» MKK oblystyq mańyzy bar joldardaǵy kópir tirekterin nyǵaıtý, kireberis jáne shyǵaberis bólikterin betondaý, sondaı-aq sý ótkizgish qubyrlardyń ótkizý qabiletin arttyrý jumystaryn atqaryp jatyr.
Al «QazAvtoJol» ulttyq kompanııasynyń Túrkistan oblystyq fılıaly respýblıkalyq mańyzy bar A-15 avtomobıl jolynyń 2-shaqyrymyndaǵy kópirdi kúrdeli jóndeýden ótkizip jatyr. Nysandy jyl sońyna deıin paıdalanýǵa berý josparlanǵan. Budan bólek, aýdan jáne qala ákimdikteri taǵy úsh nysanda tıisti jumystardy qolǵa alǵan.
Vedomstvo málimetinshe, birinshi kezekte jóndeýdi qajet etetin 10 kópir boıynsha jobalaý-smetalyq qujattamalar ázirlenip, merdiger uıymdar anyqtalǵan. Bul nysandardyń jalpy jobalyq quny – 7,8 mlrd teńge. Al ekinshi kezektegi jeti kópirdi jóndeýdiń jobalyq quny shamamen 4,2 mlrd teńge dep belgilengen.
Eske salaıyq, buǵan deıin Keles aýdanynyń turǵyndary qulaǵan kópirdi qalpyna keltirý jumystarynyń kesheýildep jatqanyna shaǵymdanǵan bolatyn.
