Túrkistan oblysynda 287 myńnan astam adam MÁMS aıasynda saqtandyrylmaǵan

TÚRKІSTAN. KAZINFORM — Túrkistan oblysynda medıtsınalyq uıymdarǵa 2 075 225 adam tirkelgen. Onyń ishinde, saqtandyrylǵan azamattar sany — 1  787 237 (86,1%) bolsa, saqtandyrylmaǵandar sany — 287 988 (13,9%). 

Oblysta bir jyl kóleminde MÁMS júıesinde saqtandyrylmaǵandar sany 102 055 adamǵa (26,2 paıyzǵa) azaıǵan.

Áleýmettik medıtsınalyq saqtandyrý qory Túrkistan oblysy boıynsha fılıalynyń dırektory Baqyt Ismahanbetovtyń aıtýynsha, bıyldan bastap D jáne E sanattary men resmı jumyssyz azamattar úshin jarnalar jergilikti bıýdjet esebinen tólenedi.

— MÁMS júıesindegi ózgeristerdiń biri — saqtandyrý esebinen qarjylandyrylatyn medıtsınalyq qyzmet túrleriniń keńeıýi. Endi osy paketke sozylmaly jáne áleýmettik máni bar aýrýlar engizildi. Búginde atalǵan baǵytta naýqastardy tolyq qamtý sharalary júzege asyrylyp jatyr. MÁMS júıesinde jumyssyz retinde tirkelgen adamdar jáne sońǵy úsh aı boıy mindetti zeınetaqy jarnalaryn aýdarmaǵan, ıaǵnı jumys istemeıtin jáne áleýmettik salamattylyqtyń D, E deńgeıine jatatyn adamdar úshin jarnalardy tóleý jergilikti atqarýshy organdardyń qarajatynan júzege asyrý kózdelgen, — dedi ol.

Resmı málimetke sáıkes, bir adamǵa aı saıynǵy jarna — 5 908 teńge bolsa, jylyna — 70 897 teńge. Eger azamat sońǵy 5 jyl qatarynan jarna tólegen bolsa, tólemde úzilis bolǵan jaǵdaıda onyń saqtandyrý mártebesi 6 aıǵa deıin saqtalady.

Sonymen qatar D jáne E áleýmettik ál-aýqattyń daǵdarys deńgeıindegi turǵan adamdardy MÁMS júıesine tartý nazarǵa alynǵan. Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Mekenhan Qyryqbaevtyń sózinshe, «Otbasynyń tsıfrlyq kartasy» derekqoryna sáıkes, búgingi tańda daǵdarys D jáne E deńgeıindegi 138 789 otbasy esepke alynǵan. Onyń ishinde, 114 156 adam MÁMS júıesimen qamtylmaǵan.

Budan buryn 2026 jyly mindetti áleýmettik medıtsınalyq saqtandyrý (MÁMS) júıesinde birqatar mańyzdy ózgerister engizilgenin jazǵan edik.