Túrkistan oblysynda 271 mln teńge sýbsıdııa qarjysyn jymqyrǵandar sottaldy
ASTANA. KAZINFORM – Túrkistan oblysynda aýyl sharýashylyǵyn qoldaýǵa bólingen bıýdjet qarajatyn jymqyrý faktisi boıynsha bir top tulǵaǵa qatysty sot úkimi shyqty.
Prokýratýranyń habarlaýynsha, 2020-2023 jyldar aralyǵynda josyqsyz kásipkerler veterınarlyq baqylaý salasyndaǵy olqylyqtardy paıdalanyp, memlekettik sýbsıdııalardy zańsyz alǵan. Atap aıtqanda, jekelegen sharýa qojalyqtary is júzinde úshinshi tulǵalarǵa satylyp ketken mal týraly derekterdi «Aýyl sharýashylyǵy janýarlaryn sáıkestendirý» aqparattyq júıesinde óz paıdasyna paıdalanǵan.
Máselen, «B» sharýa qojalyǵy buryn satylǵan 440 bas iri qara mal men 5 088 bas usaq mal týraly málimetterdi zańsyz qoldaný arqyly sýbsıdııa rásimdegeni anyqtaldy.
Jınalǵan dálelderge sáıkes, memleketke keltirilgen zalaldyń jalpy somasy 271 mln teńgeni qurap, bul asa iri mólsher retinde baǵalandy. Qylmystyq isti arnaıy prokýrorlar tergegen.
- 2025 jylǵy 1 qazanda bes aıyptalýshyǵa qatysty aıyptaý úkimi shyǵarylyp, kináliler 5 jyldan 6 jyl 6 aıǵa deıingi merzimge bas bostandyǵynan aıyryldy. Sonymen qatar memleket bıýdjetine 140 mln teńge óndirildi.
Tekserý nátıjesi qarjy jymqyrý faktileriniń veterınarlyq qyzmet tarapynan tıisti baqylaýdyń bolmaýyna baılanysty múmkin bolǵanyn kórsetti, - delingen aqparatta.
Qazirgi ýaqytta prokýratýra 300 mln teńgeden astam somaǵa qatysty ózge de uqsas jymqyrý derekterin tergep jatyr. Atalǵan qylmystyq is jaqyn arada sotqa joldanbaq.
Aıta keteıik, buǵan deıin Túrkistan oblysynda veterınarlar 271 mln teńge sýbsıdııany jymqyrǵany habarlanǵan bolatyn.