Túrkistan oblysynda 240 myń tonna kókónis egetin eń iri jylyjaı kesheni salynady
ASTANA. KAZINFORM – Qazaqstan Premer-Mınıstri Oljas Bektenov «EKO-kýltýra» agroónerkásiptik holdınginiń prezıdenti Aleksandr Rýdakovpen aýyl sharýashylyǵy salasyndaǵy yntymaqtastyq máselelerin talqylady. Kún tártibindegi másele – agrarlyq azyq-túlik qaýipsizdigin qamtamasyz etý jónindegi birlesken jobalardy iske asyrý. Bul týraly Úkimettiń baspasóz qyzmeti málimdedi.
Holdıng Túrkistan oblysy Keles aýdanynda jylyjaı keshenin salyp jatyr. Búgingi tańda 51 ga jer ýchaskesinde jylyjaı ashýdyń birinshi kezeńi júzege asyrylýda, onda jylyna 28 myń tonnadan astam qyzanaq ósiriletin bolady.
«Kezdesýge qatysýshylar 500 ga jerdi qamtıtyn jylyjaı kesheniniń aýmaǵyn keńeıtý jobasyn talqylady. Bul jyl boıy 240 myń tonnadan astam kókónis ósirýge múmkindik beredi. Óndiriletin ónim ishki naryqqa jetkiziledi, sondaı-aq logıstıkalyq jáne taratý ortalyqtarynyń kelisilgen arnalary arqyly shetelge eksporttalady. Jobanyń birinshi kezegin kelesi jyldyń sońyna deıin paıdalanýǵa berý josparda bar», — delingen habarlamada.
Aleksandr Rýdakovtyń aıtýynsha, bul álemdegi eń iri jylyjaılardyń biri bolmaq. Munda 7 myń jumys ornyn ashý kózdelgen. «EKO-kýltýra» holdıngi jergilikti turǵyndar úshin básekege qabiletti eńbek jaǵdaıyn týdyryp, áleýmettik jaýapkershilik sheńberinde óńirdiń damýyna eleýli úles qosady.
Úkimet basshysy agroónerkásip keshenin damytýdyń mańyzdylyǵyna toqtaldy.
«Azyq-túlik qaýipsizdigi, turǵyndardy sapaly ári arzan ónimdermen qamtamasyz etý — Úkimet jumysynyń negizgi basymdyǵy. Ósip kele jatqan demografııalyq kórsetkishterdi eskere otyryp, búkil álemde azyq-túlikke degen qajettilik turaqty túrde artyp keledi. Bizde ishki naryqty qamtamasyz etip, ónimdi eksporttaýǵa tolyq múmkindik bar. Búginde biz ishki qajettilikti tolyq qamtamasyz ete otyryp, aýyl sharýashylyǵy salasyn jańa deńgeıge kóterýdi jáne eksport kólemin odan ári arttyrýdy maqsat etip otyrmyz. Atalǵan baǵytta biz ınvestorlardy tartýǵa múddelimiz jáne aýqymdy jobalardy iske asyrýǵa qoldaý kórsetýge daıynbyz», — dep atap ótti Oljas Bektenov.
